“Oʻzbek tilim – iftixorim”

Har bir xalqning tili uning bor olamini, maʼnaviyati, madaniyat unsurlari, turmush tarzi va oʻylarini aks ettiradi. Aytish mumkinki, davlatning timsoli, millatning ruhi sifatida namoyon boʻladi. 21 oktyabr – Oʻzbek tiliga davlat tili maqomi berilgan kun. Bu kun mamlakatimiz, yurtdoshlarimiz hayotida unutilmas, tarixiy voqeaga aylangan va har yili katta tantana bilan nishonlanadi. Maʼnaviy-maʼrifiy tadbirlar tashkil etiladi.

Buxoro viloyat matematika faniga ixtisoslashtirilgan umumiy oʻrta taʼlim maktab-internatida ham “Adolat” SDP Buxoro viloyat Kengashi hamkorligida “ OʻZBEK TILIM – IFTIXORIM ” mavzusida tadbir oʻtkazildi.

Tadbirda soʻz olganlar tilimizning qadr-qimmatini yuksaltirish, uning imkoniyatlaridan unumli foydalanish, sofligini saqlashga alohida ahamiyat qaratdi. Yoshlarimizning tilga munosabati, uning rivoji va nufuzini oshirishdagi oʻrni haqida fikr-mulohazalar bildirildi. Oʻqituvchi va oʻquvchilar ishtirokida “Oʻzbek tiliga davlat tili maqomi berilgan kun” shiori ostida chellenj tashkil etildi. Shundan soʻng, oʻquvchilar tomonidan tayyorlangan badiiy-musiqiy tadbir taqdim etildi. Bunda ishtirokchilar ona tilimizni madh etuvchi sheʼrlar,kuy-qoʻshiqlar va sahna koʻrinishlari namoyish etildi.

Kecha soʻngida, mazkur maktabning direktori, xalq deputatlari Buxoro viloyat Kengashi deputati Gulchehra Ravshanova soʻzga chiqib, barchani bayram bilan qutladi.

Mohigul Rahimqulova,

“Adolat” SDP Buxoro viloyat Kengashi matbuot kotibi.