“Oʻzbekiston–2030” strategiyasi ayollar nigohida

Ayni kunlarda “Oʻzbekiston–2030” strategiyasi toʻgʻrisida”gi farmoni hamda “Oʻzbekiston-2030” strategiyasini 2023-yilda oʻz vaqtida va sifatli amalga oshirish chora-tadbirlari toʻgʻrisida”gi qarori mazmun-mohiyatini keng aholi vakillari, partiya aʼzolari orasida targʻibot ishlari olib borilmoqda. Xususan, Oʻzbekiston “Adolat” SDP “Ayollar qanoti” Denov tuman Kengashi tomonidan tumandagi “Bogʻi Eram” mahallasidagi 1-sonli MTTda tuman hokimligi xotin-qizlar qoʻmitasi hamda tuman IIB bilan hamkorlikda mahalla ayollari ishtirokida “Oʻzbekiston 2030” strategiyasidagi ustuvor vazifalar yuzasidan davra suhbati oʻtkazildi. Tadbirda partiya tuman “Ayollar qanoti” Kengashi faollari, xalq deputatlari tuman Kengashidagi deputatlik guruhi aʼzolari hamda mahalla tizimida faoliyat yurituvchi hokim yordamchilari, tuman IIB xodimlari, BPT faollari va mahalla xotin — qizlar faollari ishtirok etishdi.

Tadbirda soʻzga chiqqanlar tomonidan “Oʻzbekiston-2030” strategiyasini 2023-yilda oʻz vaqtida va sifatli amalga oshirish chora-tadbirlari toʻgʻrisida”gi qarorida belgilab berilgan vazifalar toʻgʻrisida maʼlumotlar berildi.

Tadbirda soʻz olganlar keyingi yillarda yurtimizda xotin-qizlarni qoʻllab-quvvatlash, ularni qiynayotgan muammolarni bartaraf etish, gender tengligini taʼminlash, turli tazyiq va zoʻravonliklardan himoya qilish, salomatligini mustahkamlash, umuman, xotin-qizlar masalasi davlat siyosati darajasiga koʻtarilganligi xususida gapirib oʻtdilar. Shunga asosan, Prezidentimiz, hukumatimiz tomonidan ana shu yoʻnalishga oid 40 dan ortiq meʼyoriy-huquqiy hujjat qabul qilinganligini taʼkidlashdi.

Shuhrat Eshniyozov, tuman IIB xodimi, tadbir ishtirokchisi:

-Ayol tabiatan kurashuvchan, oilasi, yaqinlari uchun har qanday mashaqqat-u sinovlardan oʻtishga qodir zotdir. Ammo ayolning ushbu fazilatini suiisteʼmol qilmaslik lozim. Aslida hamisha himoyaga, asrab-avaylashga muhtoj ayolni turli kamsitish, zoʻravonliklardan asrash ham muhim masalalaridan biri hisoblanadi. Shu maʼnoda opa-singillarimizni turli tazyiq va zoʻravonliklardan asrash, ana shunday koʻngilsiz holatlarga tushib qolishining oldini olish maqsadida himoya orderlarining joriy etilgani ham ijobiy natijalar bermoqda. Bugungi kunda xotin-qizlarimizning ilm olishga boʻlgan ragʻbatini oshirish, ularga imtiyoz va imkoniyatlar yaratish borasida olib borilayotgan ishlar ham quvonarlidir. Avvalo, oliygohlarda xotin-qizlar uchun qabul kvotalari oshirildi. Toʻlov-kontrakt asosida oʻqishga kirgan ijtimoiy himoyaga muhtoj oilalar farzandlari uchun kontrakt pullari toʻlab berilmoqda. Bundan tashqari, ana shu toifadagi oilalar qizlarining oliy oʻquv yurtlariga oʻqishga kirishi uchun imtiyozli tavsiyanomalar berilmoqda Oʻzbekiston Respublikasi Prezidentining joriy yil 11-sentyabrdagi “Oʻzbekiston – 2030” strategiyasi toʻgʻrisida”gi farmoni hamda “Oʻzbekiston – 2030” strategiyasini 2023-yilda sifatli va oʻz vaqtida amalga oshirish chora-tadbirlari toʻgʻrisida”gi qarorida ham xotin-qizlar masalasiga alohida eʼtibor qaratilganligi bilan ahamiyatlidir.Xususan, Prezidentimiz farmoni va qarori bilan amalga oshiriladigan vazifalar doirasida xotin-qizlarni qoʻllab-quvvatlash tizimini kuchaytirish, huquq va qonuniy manfaatlarini taʼminlash, ijtimoiy, iqtisodiy, siyosiy faolligini oshirish, gender tenglikni taʼminlashga jiddiy eʼtibor qaratilgani barchani quvontirdi.

Ishonch bilan ayta olamizki, davlatimiz rahbarining tashabbusi bilan qabul qilingan “Oʻzbekiston – 2030” strategiyasi doirasida mazkur yoʻnalishdagi ishlar bundan buyon izchil davom ettiriladi.

Ochiq va samimiy ruhda oʻtgan tadbir soʻngida ishtirokchilar oʻzlarini qiziqtirgan savollarga masʼullardan atroflicha javob oldilar. “Oʻzbekiston-2030” strategiyasini targʻibotiga bagʻishlangan davra suhbatlari tumanimizning barcha hududlarida tashkil etilib, ularda aholining turli qatlamlari qamrab olinmoqda.

Gavhar Shoimova,

Xalq deputatlari Denov tuman Kengashi deputati.