O‘zbekiston -Qozog‘iston: hamkorlikning yangi bosqichi

O‘zbekiston —qadim tarixdan geografik, demografik va iqtisodiy salohiyati bilan Osiyoning yuragi sifatida o‘zgacha ahamiyatga ega bo‘lgan hudud hisoblangan. O‘zbekiston barcha dunyo mamlakatlari, avvalo, yon-atrofimizdagi davlatlar bilan ahil qo‘shnichilik, o‘zaro hamkorlik aloqalarini yanada rivojlantirishga katta ahamiyat berib kelmoqda.

Davlatimiz rahbarining uzoq va yaqin davlatlar bilan o‘zaro munosabatlarni mustahkamlashdagi faolligi hamda olib borayotgan ochiq tashqi siyosati natijasida dunyo miqyosida O‘zbekistonga bo‘lgan qiziqish ortib bormoqda. Zero, o‘tgan yillar mobaynida O‘zbekiston tashqi siyosati butunlay yangi xarakterga va yangi mazmunga ega bo‘ldi.

Jumladan, Prezidentimizning 26 oktyabr kuni mamlakatimizga tashrif buyurgan Qozog‘iston Respublikasi Parlamenti Majlisi Raisi Erlan Koshanov bilan olib burgan suhbatida ham ikki davlat o‘rtasidagi munosabatlarning dolzarb masalalari ko‘rib chiqildi.

Ikki tomonlama munosabatlar va mintaqaviy hamkorlikning muhim jihatlari ko‘rib chiqilgan muzokaralar chog‘ida O‘zbekiston bilan Qozog‘iston o‘rtasidagi strategik sheriklik va ittifoqchilik munosabatlari, o‘zaro tovar ayirboshlash, avtomobilsozlik, to‘qimachilik, elektrotexnika, logistika va boshqa tarmoqlarda kooperatsiya loyihalariga alohida e’tibor qaratildi.

Oliy darajadagi kelishuvlarni so‘zsiz bajarish, hududlar o‘rtasidagi hamkorlikni va madaniy-gumanitar almashinuvni kengaytirish maqsadida yaqin parlamentlararo aloqalarni yanada rivojlantirish masalalari alohida ta’kidlandi.

Qonun ijodkorligi faoliyati sohasida, o‘z-o‘zini boshqarish organlarini rivojlantirish va yoshlarni qo‘llab-quvvatlash borasida tajriba almashish, shu jumladan yosh deputatlar delegatsiyalarining tashriflarini tashkil etish hamkorlikning muhim yo‘nalishi sifatida belgilab olindi.

Umuman olganda, o‘zaro hurmat, ishonch va fikrlar almashuvi ruhida o‘tgan mazkur uchrashuvda olib borilgan ochiq, samimiy muloqotlar hukumatlararo va idoralararo hamkorlikni kuchaytirish uchun mustahkam poydevor bo‘lib, O‘zbekiston-Qozog‘iston hamkorligini sifat jihatdan yangi bosqichga olib chiqadi. Bunda erishilgan kelishuvlar nafaqat ikki mamlakat, balki butun mintaqa xalqlari uchun katta ahamiyat kasb etadi.

Qolaversa, davlatlarimiz va xalqlarimiz o‘rtasidagi do‘stlik va birodarlik rishtalarini va samimiy munosabatlarni yanada mustahkamlanishiga erishiladi va xalqlarimizning azaliy do‘stligi bardavom bo‘ladi, deb ishonamiz.

Orif Shukurov,

 “Adolat” SDP Jizzax viloyat Kengashi raisi,

Xalq deputatlari Jizzax viloyat Kengashi deputati.