Obodlik yoʻlida birlashdik

Fargʻona viloyatining anklav hududi – Soʻx tumanida keng koʻlamli obodonlashtirish ishlari davom etmoqda. Tumanning mavjud resurslaridan samarali foydalanish, muhandislik-kommunikatsiya tarmoqlarini modernizatsiyalash, ijtimoiy va ishlab chiqarish infratuzilmalarini rivojlantirish, sanoat salohiyatini yanada oshirish, qishloq xoʻjaligi, servis va xizmat koʻrsatish sifatini yaxshilash, shuningdek, aholi bandligini taʼminlash va daromadlarini oshirish hisobiga tuman aholisining turmush darajasini yaxshilash boʻyicha davlatimiz rahbarining alohida qarori qabul qilingan.

Mazkur qarorga muvofiq, tumandagi avtomobil yoʻllarining qatnov qismini yaxshilash, avtotransportlar harakatini xavfsiz va toʻxtovsiz tashkil etishni taʼminlash maqsadida tuman markazida joylashgan “Yangiariq” mahalla fuqarolar yigʻinining “Yangiariq” koʻchasida asfalt yotqizish ishlari amalga oshirilmoqda.

Qarib 2000 metr masofani tashkil etadigan ushbu taʼmirlash ishlari mahallaga oʻzgacha koʻrk bagʻishlamoqda. Ushbu yoʻl qurilishida 10 dan ortiq maxsus texnikalar va 20 ga yaqin ishchi-mutaxassislar tun-u kun mehnat qilib kelmoqdalar.

Oʻz koʻchalari obodligidan koʻzlari quvongan mahalla ahli yurtimiz tinchligi, islohotlar bardavomligini tilab duo qilishmoqda,- deydi tuman Kengashi deputati Amirali Safarov.- Bugun tumanning qaysidir koʻchasiga asfalt yotqizilsa qaysidir koʻchasida suv chiqadi, boshqa manzilda esa yirik tadbirkorlik majmuasi ish boshlamoqda. Mahalla aholisining kayfiyati esa oʻzgacha. Soʻx bugun shaharlarga tenglasha oladigan obod maskan boʻlayotganidan barchamiz xursandmiz. Bir soʻz bilan aytganda Soʻxliklar obodlik yoʻlida birlashgan holda mehnat qilmoqdalar.

           “Adolat” SDP Fargʻona viloyat Kengashi Matbuot xizmati.