Oila-tinchlik qoʻrgʻoni, maʼnaviyat beshigidir

Oilalar mustahkamligini taʼminlash, jamiyatda oilaviy qadriyatlarni saqlash, oilalarda maʼnaviy axloqiy muhitni yaxshilash, oilaning jamiyat hayotidagi ahamiyatini targʻib etish maqsadida Oʻzbekiston “Adolat” SDP “Ayollar qanoti” Jarqoʻrgʻon tuman Kengashi va Respublika Maʼnaviyat va maʼrifat markazi Jarqoʻrgʻon tuman boʻlinmasi hamda tuman hokimligi bilan hamkorlikda tumandagi “Alisher Navoiy” mahalla fuqarolar yigʻinida joylashgan Maktabgacha va maktab taʼlimi boʻlimiga qarashli 19-sonli umumtaʼlim maktabida “Oila–muqaddas dargoh” mavzusida maʼnaviy-maʼrifiy tadbir tashkil etildi. Tadbirda partiya “Ayollar qanoti” Jarqoʻrgʻon tuman Kengashi faollari, Respublika Maʼnaviyat va maʼrifat markazi tuman boʻlinmasi vakillari, tuman hokimligi xodimlari, deputatlar, 19-sonli umumtaʼlim maktabi pedagoglar jamoasi, BPT faollari va maktabning yuqori sinf oʻquvchilari qatnashdilar.

Tadbirda soʻz olganlar Oila muqaddasligini taʼminlash jamiyat asoslarini mustahkamlash bilan barobar ekanligini, shu bois, Oʻzbekiston Respublikasida oila asoslarini mustahkamlash davlat ahamiyatiga molik vazifalardan hisoblanishini gapirib oʻtishdi. Oila milliy qadriyatlar maskani hisoblanishi, shuning uchun oilaviy madaniyat, oilaviy hayotga ongli kirib borish, oilaviy vazifalarni bajarishga tayyorgarlik, hayotda oilani yuksak qadrlash, oilaga masʼuliyat bilan qarash, xalq maʼnaviy merosidagi oila qadriyatlarini oʻz zamoni talablari bilan birga uygʻunlashtirib rivojlantirish har vaqt inson hayotiy mezonini va jamiyat oldida turgan dolzarb vazifalardan biri sifatida tan olinishi xususida taʼkidlab oʻtildi.

Tadbir davomida oilani muqaddas deb bilmagan inson – maʼnaviy qashshoq inson ekanligini, oilani muqaddas deb anglash har bir jamiyat aʼzosining oʻz vijdoni, oʻz oilasi va farzandlari oldidagi burchi ekanligi aytib oʻtildi.

Ochil Jiyanov, Xalq deputatlari Jarqoʻrgʻon tuman Kengashi deputati:

-Jamiyat negizi – oilada yoshlar maʼnaviyatini tarbiyalashda asosiy tayanchdir. Har bir oilaning mustahkamligi, oila aʼzolarining tinch va farovon hayot kechirishi, oʻzaro hurmat va izzatda yashash bu yoshlarni kelgusi oilaviy hayotga tayyorlashda muhim omildir. Mamlakat aholisining yarmidan koʻproq qismini yoshlar tashkil qilishi, oʻsib borayotgan yosh avlodni jamiyatda mustaqil yashashga tayyorlash vazifasining dolzarbligi yoshlarda jamiyat hayotiga va oilaviy turmushga tayyorlash ishlarini jadallashtirishni va yangicha mazmunda qayta qurishni talab etadi. Insonlarning oʻzaro munosabatlarida keskinliklarning oʻsib borayotganligi, zamonaviy ziddiyatlarning inson tafakkuri va ongiga taʼsir etish orqali uning psixologik holatida salbiy va asabiy oqibatlarning vujudga kelishi, yosh oilalardagi ajrim holatlarning muntazam oʻsib borayotganligi, bolalar va oʻsmirlardagi agressiya holatlarining vujudga kelayotganligi kabi muammolar yoshlarni oilaga tayyorlash vazifasini toʻlaqonli olib borish talabini kun tartibiga qoʻyadi.

Shuningdek ishtirokchilar tomonidan oila psixologiyasi, kattaga hurmat kichikka izzatda boʻlish, oilada gigiyenik qoidalar, oilaviy munosabatlar, qarindosh- urugʻchilik munosabatlari va farzand tarbiyasi haqida, sogʻlom turmush tarzi, erta nikoh, kiyinish madaniyati, qarindoshlar oʻrtasidagi nikohning zararli tomonlari, ajrim sabablari haqida fikr yuritildi.

Davra suhbati soʻnggida yoshlar oʻzlarini qiziqtirgan savollariga javob oldilar.

Qizlarshoy Rahmatova,

Xalq deputatlari Jarqoʻrgʻon tuman Kengashi deputati.