Oilalar mustahkamligi-jamiyat taraqqiyoti garovi

“Adolat” SDP Sherobod tuman Kengashi va tuman “Ayollar qanoti” Kengashi tomonidan tumandagi Axborot kutubxona markazida “Oilalar mustahkamligi-jamiyat taraqqiyoti garovi” mavzusida tadbir tashkil etildi. Tadbirda partiya tuman Kengashi va “Ayollar qanoti” Kengashi faollari, deputatlar, Axborot kutubxona xodimlari va BPT faollari ishtirok etishdi.

Tadbirda soʻz olganlar mamlakatimiz ijtimoiy-siyosiy hayotining barcha jabhalaridagi jarayonlarda xotin-qizlarning ishtiroki va faolligi tobora ortib borayotganligi, bu, albatta, yurtimizda xotin-qizlarning oʻz salohiyatlarini toʻlaqonli yuzaga chiqarishi uchun yaratib berilayotgan imkoniyatlar, imtiyozlar, umuman, ularni qoʻllab-quvvatlashga qaratilgan keng koʻlamli ishlar samarasi ekanligini taʼkidlab oʻtishdi. Shuningdek, jamiyatimiz rivojida hayotimiz gultoji boʻlgan xotin-qizlarning maʼnaviy yetuk, tafakkuri keng, iqtisodiy, huquqiy jihatdan bilimdon va faol boʻlishi muhim ahamiyat kasb etishi aytib oʻtildi.

Sanobar Karimova, partiya Sherobod tuman “Ayollar qanoti” Kengashi faoli, tadbir ishtirokchisi:

Keyingi yillarda yurtimizda xotin-qizlarni qoʻllab-quvvatlash, ularni qiynayotgan muammolarni bartaraf etish, gender tengligini taʼminlash, turli tazyiq va zoʻravonliklardan himoya qilish, salomatligini mustahkamlash, umuman, xotin-qizlar masalasi davlat siyosati darajasiga koʻtarildi. Prezidentimiz, hukumatimiz tomonidan ana shu yoʻnalishga oid 40 dan ortiq meʼyoriy-huquqiy hujjat qabul qilindi. Oʻzbekiston Respublikasi Prezidentining joriy yil 11-sentyabrdagi “Oʻzbekiston – 2030” strategiyasi toʻgʻrisida”gi farmoni hamda “Oʻzbekiston – 2030” strategiyasini 2023-yilda sifatli va oʻz vaqtida amalga oshirish chora-tadbirlari toʻgʻrisida”gi qarorida ham xotin-qizlar masalasiga alohida eʼtibor qaratilgan. Aytish joizki, inson kamolotining muhim tarkibiy qismlaridan biri boʻlgan salomatlik shaxsning hech kim daxl qila olmaydigan huquqi, oʻz-oʻzini rivojlantirish, shaxsiy va jamiyat hayotida faol ishtirok etishi garovidir. Maʼlumki, jamiyatimizda inson salomatligi, jismoniy barkamolligi, sogʻlom turmush tarzi madaniyatiga egaligi oʻta muhim ijtimoiy qadriyat hisoblanadi. Millat salomatligini taʼminlash, xalq genofondini bekam-u koʻst saqlash sogʻlom turmush tarzi tufayligina yetarlicha ijobiy tarzda hal etiladi. Bu esa, jamiyatning barcha ijtimoiy institutlari; oila, oʻquv-tarbiya maskanlari, mahalla hamda mustaqil taʼlim oldiga jamiyatimiz fuqarolariga sogʻlom turmush tarzi mazmuni va mohiyatini anglatish, yoshlarni sergak va bilimdon, barkamol shaxs qilib tarbiyalash masalasini koʻndalang qilib qoʻyadi.

Tadbir davomida talabalarga erta turmush qurish, yaqin qarindoshga turmushga chiqishning salbiy oqibatlari haqida atroflicha tushuntirib oʻtildi.

Tadbir soʻnggida ishtirokchilar oʻzlarini qiziqtirgan savollariga javoblar olishdi.

Manzura Ulugʻberdiyeva,

“Adolat” SDP Sherobod tuman “Ayollar qanoti” Kengashi faoli.