Onkolog va radiologlarning boʻlib oʻtgan XIX — ilmiy - amaliy konferensiyasi xalqimizga sifatli tibbiy xizmat koʻrsatishga xizmat qiladi

Bugun barcha sohalarda islohotlar amalga oshirilmoqda, jumladan, onkologiya sohasida ham. Natijada kasallikni erta aniqlash, davo choralarini amalga oshirish imkoniyati kengaymoqda. Ayniqsa, markazlarda turli zamonaviy tibbiy uskunalarning oʻrnatilishi va ulardan samarali foydalanishning yoʻlga qoʻyilishi bemorlarga tez va sifatli tibbiy yordam koʻrsatilishini taʼminlamoqda. Shuningdek, chet ellik malakali mutaxassislar bilan oʻzaro tajriba almashish jarayoni ham yoʻlga qoʻyilgan. Xorazm viloyatida “Oʻsmalarni tashxislash va davolashda zamonaviy texnologiyalar” mavzusida boʻlib oʻtgan respublika onkolog va radiologlarning XIX- ilmiy-amaliy Konferensiyasi ham ana shu maqsadga qaratildi.

Konferensiya 300ga yaqin delegatlar ishtirokida dolzarb mavzulardagi maʼruza va suhbatlar bilan yanada qizgʻin oʻtdi. 20dan ortiq davlatdan kelgan vakillar bir mavzu atrofida oʻzaro fikr bildirishdi.

Konferensiya Toshkent tibbiyot akademiyasi Urganch filialida oʻz ishini boshladi. Talabalar bilan malakali mutaxassislar ishtirokida tashkil etilgan mahorat darslari ham nazariyani amaliyot bilan boyitish, yangiliklardan boxabar boʻlish imkonini berdi. Respublika ixtisoslashtirilgan onkologiya va radiologiya ilmiy-amaliy tibbiyot markazi hududiy filiallari onkologlari, mahalliy va xorijiy tajribali shifokorlar oʻz tajribalari bilan oʻrtoqlashishdi.

Tajribali shifokorlar, olimlar ishtirokidagi yana bir jarayon murakkab jarrohlik amaliyoti bilan bogʻliq boʻldi. Respublika ixtisoslashtirilgan onkologiya va radiologiya ilmiy-amaliy tibbiyot markazi Xorazm filialida oʻsma kasalligi boʻlgan ikkita bemorda jarrohlik amaliyoti oʻtkazildi. Bu kabi hamkorlik ishlari shifokorlarning malakasini oshirishga, eng muhimi bemorlarga sifatli tibbiy yordam koʻrsatishida muhim oʻrin tutadi.  

Konferensiyada taʼkidlanganidek, onkologik kasallikka chalingan bemorga yordam berish qiyin, degan tushuncha bugun eskirdi, — deydi RIO va RIATM Xorazm filiali direktori, “Adolat” SDP Xorazm viloyat Kengashi raisi Taxir Palvanov. – Agarda bemor tibbiy nazoratda tursa, vaqtida davolansa, umrini uzaytirish mumkin. Zamonaviy tibbiy uskunalar, malakali mutaxassislar koʻmagida kasallikni erta bosqichda aniqlash, unga oʻz vaqtida davo choralarini qoʻllashda bugun yetarlicha sharoit yaratilgan. Agar fuqarolar oʻz vaqtida tibbiy koʻrikdan oʻtishsa har qanday kasallikni oldi olinadi.

  Konferensiyaning ikkinchi kuni Xiva shahridagi “Farovon” mehmonxonasi konferensiya zallarida davom etdi. Unda, “Oʻsmalarni tashhislash va davolashda zamonaviy texnologiyalar” mavzusida Konferensiyani Sogʻliqni saqlash vaziri A.Sh. Inoyatov va RIOvaRIATM direktori M.N.Tillyashayxov ochib berdi. Ushbu Kongressda 250 ga yaqin delegatlar ishtirok etdi. Delegatlar dunyoning Hindiston, Koreya Respublikasi, Turkiya, Misr, Rossiya federatsiyasi, Buyuk Britaniya, Qirgʻiziston kabi 20 dan ortiq davlatidan tajribali onkologlar ishtirok etishdi.

Konferensiyasida xorijlik va mahalliy onkologlarning   “Siydik chiqarish yoʻllari oʻsmalari”, “Yoʻgʻon ichak onkologik kasalliklari” , “Koʻkrak qafasi va qorin boʻshligʻi aʼzolari oʻsma kasalliklari”, “Ayollar reproduktiv tizimi onkoginekologik va sut bezi saratoni kasalliklari”, “Suyak, yumshoq toʻqima va teri ammalari, bosh va boʻyin oʻsmalari, neyroonkologiya va kam uchraydigan oʻsma” kasalliklari boʻyicha tibbiyotning tashish qoʻyish va davolashning yangi usullari toʻgʻrisida maʼruzalari tinglandi.

Shundan soʻng delegatlar Xiva shahridagi “Ichan qalʼa”, “P.Mahmud maqbarasi”, “Xon saroy” va boshqa tarixiy obidalarni katta qiziqish bilan tomosha qilishdi.

Konferensiyaning uchinchi kuni xorijlik va mahalliy onkologlarning boʻlajak shifokorlar, yoshlar ishtirokidagi muloqotlari bilan davom etdi.

Bir soʻz bilan aytganda, bu kabi ilmiy-amaliy konferensiyalarning yuqori darajada, samarali tashkil etilishi, mamlakatimizda tibbiyot sohasini yanada rivojlantirish, malakali kadrlarni shakllantirish barobarida xalqimizga sifatli tibbiy xizmat koʻrsatishda ahamiyati kattadir.

                                                                                Zamira Abdullaeva,

                                                    “Adolat” SDP Xorazm viloyat Kengashi, RIO va RIATM Xorazm filiali matbuot kotibi.