Partiya Surxondaryo viloyat Kengashining XVI Plenumi boʻlib oʻtdi

Bugun Oʻzbekiston “Adolat” sotsial-demokratik partiyasi Surxondaryo viloyat Kengashining navbatdan tashqari onlayn XVI Plenumi boʻlib oʻtdi.Plenumda partiya viloyat Kengashi aʼzolari, masʼul xodimlari, deputatlar va partiya faollari ishtirok etdi. Plenumda 2023-yil 9-iyul kuni oʻtkazilishi belgilangan Oʻzbekiston Respublikasi Prezidenti saylovi jarayonida partiya viloyat Kengashining oldida turgan muhim masalalar muhokama etildi.

Plenumda soʻzga chiqqanlar tomonidan saylovoldi targʻiboti davrida partiya tashkilotlari va faollarining samarali ish yuritishi, qonun bilan belgilangan vakolatlarni toʻla ishga solgan holda, birinchi navbatda yurtimizdagi mazkur muhim siyosiy jarayonlardan aholining xabardorligini oshirishga qaratilgan targʻibot tadbirlarining sifati va samaradorligi masalalariga alohida eʼtibor qaratildi.
Oʻz navbatida “Adolat” SDPning dasturiy maqsad va vazifalari oʻzida aholi manfaatlarini ifoda etishi hamda boʻlajak saylov partiya gʻoyalarini yana bir bor saylovchilar orasida keng targʻib qilish, partiyadan koʻrsatilgan Prezidentlikka nomzodning saylovoldi dasturi orqali elektorat manfaatlarini yanada chuqurroq ifodalash imkonini berishi taʼkidlandi.

Aytish joizki, islohotlarning ijtimoiy samaradorligini oshirish, elektorat vakillari, saylovchilarda siyosiy-huquqiy bilim va faollik kuchayishida saylovlar dolzarb ahamiyatga ega. Partiyamizning jamiyatdagi nufuzi elektorat manfaatlarini qay darajada himoya qilayotganimiz, joylardagi muammolarning yechimi yuzasidan qanday tashabbuslar bilan chiqayotganimizga qarab baholanadi.

Shuningdek, partiya organlari tomonidan imzo toʻplash jarayonini har jihatdan mukammal oʻtkazish, varaqalar toʻgʻri toʻldirilishi ustidan nazoratni yoʻlga qoʻyilishi xususida ham taʼkidlanib oʻtildi. Mazkur tadbirlarni uyushqoqlik bilan oʻtkazish uchun shahar va tuman partiya kengashlari va boshlangʻich partiya tashkilotlari imkoniyatlaridan samarali foydalanish masalasiga jiddiy eʼtibor berilishi yuzasidan fikr-mulohazalar bildirildi.

Bildirilgan taklif va tavsiyalarni inobatga olgan holda, muhokama qilingan barcha masalalar yuzasidan partiya viloyat Kengashi tegishli qarorlarni qabul qildi.

Gulshod Tursoatova,

Oʻzbekiston “Adolat” SDP Surxondaryo viloyat Kengashi matbuot kotibi.