Plenumda kun tartibidan o'rin olgan masalalarga jiddiy yondashildi

Joriy yilning 31-mart kuni Oʻzbekiston “Adolat” sotsial-demokratik partiyasi Toshkent viloyati Kengashining navbatdagi X Plenum majlisi gibrid tarzda yaʼni ham oflayn, ham (Zoom) dasturi orqali onlayn tarzida oʻtkazildi. Unda partiya Toshkent viloyati Kengashi raisi vazifasini vaqtincha bajaruvchisi Farmon Allayev, partiyaning viloyat Kengashi xodimlari, viloyat, shahar va tumanlar Kengashi raislari va deputatlari va partiya faollari ishtirok etishdi.

Mazkur jarayonda partiya Toshkent viloyati Kengashining 2022-yilgi faoliyati sarhisob qilinib, joriy yildagi rejalar, xususan, 2022-2026-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha harakatlar strategiyasini “Insonga eʼtibor va sifatli taʼlim yili”da amalga oshirishga oid Davlat dasturi ijrosini taʼminlashda Oʻzbekiston “Adolat” SDPning oldida turgan vazifalar muhokama qilindi.

Plenumda Oʻzbekiston “Adolat” SDP Toshkent viloyati Kengashi raisi vazifasini vaqtincha bajaruvchisi Farmon Allayev maʼruza qildi.

U oʻz nutqida mamlakatimizni har tomonlama jadal rivojlantirishga yoʻnaltirilgan Prezident farmonlari, “Inson qadrini ulugʻlash va faol mahalla yili”da amalga oshirishga oid Davlat dasturi, Davlatimiz rahbarining 2021-yil 2-fevralda siyosiy partiyalar vakillari bilan boʻlib oʻtgan uchrashuvida belgilangan ustuvor vazifalar, partiyaning “Taraqqiyot strategiyasi”dan kelib chiqadigan chora-tadbirlar rejasi hamda partiyaning “Adolat – har bir inson uchun” saylovoldi Dasturida belgilangan ustuvor vazifalar ijrosiga atroflicha toʻxtaldi.

Taʼkidlanganidek, mamlakatimiz Prezidenti tomonidan qabul qilinayotgan farmon va qarorlarda partiyamiz saylovoldi dasturida ilgari surilgan qator masalalar oʻz aksini topayotganligi partiyamizning saylovchilar oldida bergan vaʼdalarimizni roʻyobga chiqarishga keng imkoniyat yaratmoqda. Harakatlar strategiyasida ham partiyamiz tomonidan bildirilgan takliflar o'z aksini topganligi “Adolat”chilarni quvontirishi bilan birga ulkan masʼuliyatlar yuklaydi.

Jumladan, xalq bilan yuzma-yuz muloqot oʻrnatish maqsadida partiyaning “Muammo bilan yuzma-yuz” loyihasi doirasida barcha darajadagi deputatlik korpuslari ishtirokida joylarga qonunlarning yetib borishi va ularning ijrosini oʻrganish, mavjud muammolarni bartaraf etish choralarini koʻrish boʻyicha tegishli davlat organlariga takliflar kiritish orqali qonun ustuvorligini taʼminlashga qaratilgan amaliy ishlar belgilandi. Partiyaning barcha tuman va shahar Kengashlarida partiya faollari va deputatlardan iborat ishchi guruhlari tuzilib, har haftaning chorshanba kunlari muntazam ravishda joylarda “mahallabay” va “fuqarobay” tarzda xalq bilan yuzma-yuz muloqotlar oʻrnatildi.

Shu bilan birga, partiya aʼzolari safini kengaytirish, boshlangʻich partiya tashkilotlari faoliyatini kuchaytirish, kadrlar zaxirasini mustahkamlash, aʼzolik badallari tushumini tizimli yoʻlga qoʻyish va toʻliq taʼminlash, partiya Toshkent viloyati Kengashi faollarining bilimlari va faolligini oshirishga ham alohida eʼtibor qaratildi.

Hisobot davrida viloyatdagi partiya aʼzolari soni 4620 nafarga koʻpayib, umumiy aʼzolar soni 43194 nafarni, boshlangʻich partiya tashkilotlari soni esa 460 tani tashkil qildi.

Sarhisob qilinayotgan davrda 325 ta turli mavzulardagi tadbirlar oʻtkazilib, tadbirlarda jami 3269 nafar ishtirokchi qatnashdi.

Xususan, mafkuraviy va dasturiy vazifalarni amalga oshirishga qaratilgan 10 dan ortiq partiya loyihalari hayotga samarali tatbiq etildi.

Shuningdek, “Adolat” SDP Toshkent viloyati Kengashi tomonidan joriy yilning 24-iyunidan 1 avgustiga qadar Konstitutsiya loyihasi muhokamasiga bagʻishlab 185 ta tadbirlar oʻtkazildi va ularda 869 nafardan ortiq fuqarolar ishtirok etdi.

1-iyun “Xalqaro bolalarni himoya qilish kuni”, 3-dekabr – Xalqaro nogironlar kuni hamda 8-dekabr – Oʻzbekiston Respublikasi Konstitutsiyasi qabul qilinganligining 30 yilligi arafasida “Bor mehrimiz senga, bolajon!” shiori ostida begʻaraz donorlik aksiyasi oʻtkazildi.

“Bir oyda – bir ish oʻrni” loyihasi doirasida jami 122 nafardan ortiq xotin-qizlar va yoshlar ish bilan taʼminlandi.

Oʻtgan davrda xalq deputatlari tuman-shahar Kengashlarda faoliyat yuritayotgan partiya deputatlari tomonidan 265 dan ortiq deputatlik soʻrovlari chiqarilib, 47 marotaba mansabdor shaxslarning hisobotlari eshitildi.

Xalq deputatlari tuman va shahar Kengashlardagi Oʻzbekiston “Adolat” SDP Toshkent viloyati deputatlik guruhlari tomonidan Xalq deputatlari viloyat, tuman va shahar Kengashlari koʻrib chiqish uchun doimiy komissiyalarga 27 ta, sessiyalarga esa 35 ta masalalar kiritildi. Natijada sessiya va doimiy komissiyaga kiritilgan masalalardan kelib chiqib, aniqlangan kamchiliklarni oʻz vaqtida bartaraf etish yuzasidan masʼul mansabdor shaxslarga aniq topshiriqlar berildi hamda Kengashning tegishli komissiyasi tomonidan qarorlar ijrosi nazoratga olinishi belgilandi.

Sessiyalarga masalalar kiritish boʻyicha partiyaning xalq deputatlari Zangiota tumani (4 ta), Bekobod shahar (1 ta), Bekobod tumani (6 ta), Boʻka (19 ta) tumandagi deputatlik guruhlari faol boʻldilar.

Biroq, partiyaning xalq deputatlari Qibray, Quyi Chirchiq, Oʻrta Chirchiq, Yuqori Chirchiq, Oqqoʻrgʻon, Chinoz, Yangi yoʻl, Toshkent tumanlari va Yangiyoʻl shahar hamda Nurafshon shahar deputatlik guruhlari faoliyati samaradorligi sust boʻldi.

Hisobot davrida Matbuot xizmati tomonidan partiyaning dasturiy maqsadlari ommaviy axborot vositalari orqali keng targʻib etildi. Saylovoldi dasturini amalga oshirish yuzasidan 2022-yilga moʻljallangan Media rejada belgilangan vazifalar ijrosi doirasida oʻtkazilgan tadbirlar yuzasidan keng jamoatchilik, partiya elektoratining xabardorligi taʼminlandi.

Partiya va deputatlik korpusi tomonidan OAV, ijtimoiy tarmoqlar va axborot saytlarida 105 dan ortiq maqolalar eʼlon qilindi. Ularda yurtimizda amalga oshirilayotgan islohotlar, ijtimoiy tarmoqlarda muhokamalarga sabab boʻlayotgan mavzularga partiyaning munosabati va nuqtai nazari bildirildi. Respublika telekanallarida 86-marta partiya faollarining intervyulari berildi.

Partiya veb-saytida jami 56 ta partiyaning viloyat Kengashi faoliyati boʻyicha maʼlumot va xabarlar yoritildi. Har bir hududiy Kengash ijtimoiy tarmoqlardagi oʻzining rasmiy sahifalarida kundalik yangilab borildi.

Partiyaning viloyat Kengashi deputatlari va faollarining aholi bilan muloqotini yanada jadallashtirish, joylarda hududlarning ijtimoiy-iqtisodiy rivojlanishi, sogʻliqni saqlash, taʼlim sohalaridagi islohotlarga toʻsiq boʻlib kelayotgan muammolarni oʻrganib, ularning yechimini topish masalalari partiyaning barcha tuzilmalari eʼtibori markazida boʻlishi zarurligiga eʼtibor qaratildi.

Oʻzbekiston “Adolat” SDP Toshkent viloyati Kengashi 2022-yilda partiyaning dasturiy vazifalarini amalga oshirishga qaratilgan loyihalarni amalga oshirishda, partiya elektorati va aholining keng qatlami bilan yuzma-yuz muloqotlar tashkil qilib, ularni qiynayotgan, jamiyat rivojiga toʻsiq boʻlayotgan muammolarni bartaraf etish boʻyicha takliflar ishlab chiqishda, barcha darajadagi deputatlik korpuslarining hamkorligini tizimli yoʻlga qoʻydi. Bunda ayniqsa, “viloyat – tuman” konsepsiyasi oʻzining ijobiy samarasini berdi.

Plenum kun tartibidagi masalalar yuzasidan Oʻzbekiston “Adolat” SDP Toshkent viloyati Kengashi Ayollar va yoshlarning mafkura yoʻnalishi bosh mutaxassisi S. Javlalhanova, partiyaning ijrochi kotibi S. Kushenboyevning maʼruzalari tinglandi.

Yigʻilishda partiyaning barcha darajadagi tuzilmalari va deputatlik korpusining 2022-yilda amalga oshirgan ishlari, erishilgan yutuqlar barobarida yoʻl qoʻyilgan kamchiliklar tanqidiy-tahliliy nuqtai-nazardan koʻrib chiqildi.

- Bugungi Plenumda faoliyatimizga boʻlgan tanqidiy baho oʻrinli deb, oʻylayman, — dedi Oʻrta Chirchiq tumani Kengashi raisi Polvonjon Ablyazov. -Berilgan ogohlantirishlardan toʻgʻri xulosa chiqarib, vazifamizga masʼuliyat bilan yondashishimiz lozim. Past koʻrsatgichlarda qayd etilgan tumanlarimiz bilan birgalikda, hamjihatlikda saʼy-harakatlar olib borib, ularni ham yuqori natijalarga koʻtarishga erishmogʻimiz darkor.

Albatta, bu koʻrsatkichlar partiya dasturiy maqsad-vazifalarini toʻla roʻyobga chiqarish uchun yetarli emasligi, buning uchun deputatlar oʻz vakolatidan samarali foydalanishlari, tashabbuskorlikni yanada oshirishlari talab etilishi taʼkidlandi. Shuningdek, Plenumda Oʻzbekiston “Adolat” SDP Toshkent viloyat Kengashining joriy “Insonga eʼtibor va sifatli taʼlim yili”da amalga oshirishi lozim boʻlgan ustuvor vazifalari hamda partiya faoliyatiga doir boshqa masalalar koʻrib chiqildi. Muhokama etilgan barcha masalalar yuzasidan partiya viloyat Kengashining tegishli qarorlari qabul qilindi.

Ravshan Mirzaqulov,
Oʻzbekiston “Adolat” SDP
Toshkent viloyati Kengashi matbuot kotibi