Plenumda   muhim masalalar muhokama etildi

“Adolat” SDP Qashqadaryo viloyat Kengashining navbatdan tashqari XI Plenumi boʻlib oʻtdi. Unda Oʻzbekiston “Adolat” SDP ning navbatdan tashqari XI-Qurultoyiga delegatlar saylash masalasida partiyaning tuman, shahar konferensiyalarini oʻtkazish hamda hududiy partiya tashkilotlaridan delegatlar saylash miqdori va tartibi toʻgʻrisidagi masala koʻrib chiqildi.

Plenumda mahalliy Kengash deputatlari, partiyaning tuman, shahar Kengashlari raislari, faollar, faxriylar hamda ommaviy axborot vositalari vakillari qatnashdi.

Kun tartibidagi birinchi masala yuzasidan partiya viloyat Kengashi raisi Ruiddin Raupov maʼruza qildi.

Saylovlar demokratiya koʻzgusi,-dedi Ruiddin Raupov.- Bu yilgi boʻlib oʻtadigan navbatdan tashqari saylovda barchamiz bir yoqadan bosh chiqarib, hamkorlikda, hamjihatlikda faoliyat olib borishimiz talab etiladi. Shu kecha kunduzda partiyamiz hayotida kechayotgan ovoz yigʻish borasidagi ishlarimizni ham har tomonlama namunali poyoniga yetkazishimiz zarur. Partiyamizning XI-Qurultoyiga munosib delegatlarni tanlab olish uchun tuman, shahar konferensiyalarini yuqori saviyada va koʻtarinkilik ruhida oʻtkazish kerak.

Plenumda birinchi masala yuzasidan muzokarada soʻzga chiqqan partiyaning Chiroqchi tuman Kengashi raisi Sobir Axmedov, partiya viloyat Kengashi bosh mutaxassisi Dilrabo Choriyeva, Mirishkor tuman Kengashi raisi Toʻlqin Xidirov va boshqalar haqiqatdan ham konferensiyani shiddatkor davr ruhidan kelib chiqqan holda oʻtkazish va partiya Siyosiy Kengashining XI-Qurultoyiga koʻp ming sonli partiyamiz aʼzolari orasidan munosib nomzodlarni saralab saylash yuzasidan oʻz fikr mulohazalarini bildirdilar.

“Yangi Konstitutsiyaning mazmun mohiyatini aholi orasida keng targʻibot-tashviqot qilish borasida partiya tashkilotlarining vazifalari” mavzusidagi masala yuzasidan partiya viloyat Kengashi raisi oʻrinbosari Abdulaziz Abdiyev maʼruza qildi.

Plenumda partiya hayotiga oid boshqa masalalar ham atroflicha koʻrib chiqilib, muhokama qilindi. Anjuman yakunida kun tartibida muhokama etilgan barcha masalalar yuzasidan tegishli qarorlar qabul qilindi.

    Dilafroʻz Yavkochdiyeva,

Partiya faoli.