Popda sessiyaga masala kiritildi

Yaqinda boʻlib oʻtgan sessiyada xalq deputatlari Pop tuman kengashining deputatlari bugungi kunda jamiyatda dolzarb boʻlib turgan masalani muhokama etdilar. Kun tartibiga xotin-qizlar muammolarini hal etish boʻyicha olib borilayotgan ishlarning holati kiritildi. Tahlil oʻtkazish uchun Prezident Shavkat Mirziyoyevning 2022 yil 1 martda oʻtkazgan videoselektor yigʻilishida qoʻyilgan vazifalarning ijrosi asos qilib olindi.

-Davlatimiz rahbari va hukumat tashabbusi bilan yurtimizda ayollar uchun munosib shart-sharoitlar yaratishga alohida eʼtibor qaratilmoqda — deydi Pop tuman hokimining oʻrinbosari, oila va xotin-qizlar boʻlimi boshligʻi Gulhayo Ergasheva. — Shuning uchun oʻz faoliyatimizga tanqidiy baho berishimiz va kamchiliklarni aniqlab olishimiz katta ahamiyatga ega. Xalq deputatlari tuman kengashidagi “Adolat” SDP guruhi aʼzolarining bu masalani oʻrgangan xodimlari bizga juda qoʻl keldi.

Albatta, safdoshlarimiz ishga jiddiy kirishdilar. Oila va xotin-qizlar bilan birgalikda oʻrganish dasturi ishlab chiqildi. Ishga faollar ham jalb etildi. Ijtimoiy-iqtisodiy sohalardagi har bir tarmoq, barcha hududlar holati nazardan oʻtkazildi, natijalar eʼtirof qilindi. Yoʻl qoʻyilgan nuqsonlar aniqlab chiqilib, ularning sabablari ham ochib tashlandi. Ahvolni oʻnglash yuzasidan tavsiyalar ishlab chiqildi.

Masalaning sessiyadagi muhokamasi jonli va taʼsirchan chiqishiga maʼruza puxta tayyorlangani, dalil va raqamlarga boyligi ham sabab boʻldi. Boz ustiga barcha materiallar oila va xotin-qizlar boʻlimi faollari bilan oʻtkazilgan qoʻshma yigʻilishda koʻrib chiqildi. Shunda ham juda koʻp foydali takliflar kiritildi. — Sessiya qarorlarining loyihasida esa belgilanadigan vazifalar, ularni ijro etadigan mutasaddilar aniq koʻrsatildi.

Sessiyada kun tartibidagi masala yuzasidan xalq deputatlari tuman kengashidagi “Adolat” SDP guruhi rahbari Maftuna Mamatova maʼruza qildi. Bir qator deputatlar, jamoatchilik vakillari qimmatli fikr-mulohazalar bildirdilar.

Sessiya qabul qilgan qarorda tez orada amalga oshirilishi lozim boʻlgan qator vazifalar belgilandi. Xususan, sektor rahbarlari hamda tuman hokimining oʻrinbosarlari bilan birgalikda xotin-qizlarning murojaatlarini, shu jumladan, “Ayollar maslahat kengashi”ga kelib tushgan murojaatlarini koʻrib chiqish orqali ayollarning doimiy daromad manbai yaratilishini har oyda oʻrganib borish yuklatildi. “Ayollar daftari”ga kiritilgan ayollarni har oyda sektor ishchi guruhi aʼzolari hamda mutasaddi tashkilotlar rahbarlari bilan birgalikda “Ayollar daftari”ga kiritilgan ishsiz ayollarning muammolarini hal etish boʻyicha manzilli ishlashning samaradorligini oshirish, biznes tashabbuslarini qoʻllab-quvvatlash, kasb-hunarga oʻrgatish, ularning bandligini taʼminlash boʻyicha tizimli ishlarni amalga oshirish zarurligi qayd etildi. Xalq deputatlari Pop tumani Kengashining doimiy komissiyalari va deputatlariga har oyda kamida bir marotaba hududlarga chiqqan holda, “Ayollar daftari” ga kirgan xotin-qizlar bilan muloqot oʻtkazish, tanlov asosida ulardagi muammolarning hal etilishi, masʼul xodimlarning faoliyati natijadorligi, “Ayollar daftari” ga kiritilgan xotin-qizlar va oilalarga koʻrsatilayotgan yordamlarini oʻz vaqtida va manzilli tarzda yetkazishni alohida nazoratga olish topshirildi. “Adolat” SDP Pop tuman kengashi raisi Zafarjon Hasanovni taʼkidlashicha, oila va xotin-qizlar boʻlimi bilan birgalikda olib borilgan ish yaxshi samara berdi. Mazkur hamkorlik kelgusida ham davom etadi.

Nurbek Abdullaev,

"Adolat" SDP Namangan viloyat

Kengashi matbuot kotibi.