Qon-hayot uchun hadya etiladigan bebaho neʼmat

Oʻzbekiston “Adolat” sotsial-demokratik partiyasi Surxondaryo viloyat Kengashi viloyat qon quyish markazida 1-iyun – “Xalqaro bolalarni himoya qilish kuni” munosabati bilan “Bor mehrimiz senga, bolajon!” shiori ostida begʻaraz donorlik aksiyasi tashkil etdi.

Aytish joizki,     “Adolat” sotsial-demokratik partiyasi tomonidan mazkur aksiya har yili ikki marta oʻtkazib kelinmoqda. Ushbu shior ostidagi tadbir yuzlab kishilarni qonga muhtoj boʻlgan bemor bolajonlarga hayot bagʻishlash va ularning sogʻayib ketishlariga hissa qoʻshishdek xayrli va savobli ish uchun birlashtiradi.

Erta tongdan boshlangan mazkur aksiyada partiyaning barcha xodimlari, partiya aʼzolari, xalq deputatlari tuman va shahar Kengashi deputatlari, partiya faollari hamda koʻngillilar, huquqni muhofaza qiluvchi organlar hamda boshqa turli soha vakillari ishtirok etdi.

Mazkur donorlik aksiyasidan koʻzlangan asosiy maqsad partiyaning aholi salomatligini saqlash, fuqarolarni koʻngilli ravishda qon topshirishga chaqirish va shu orqali tibbiy-ijtimoiy koʻmakka muhtoj bolalarni qoʻllab-quvvatlash, bemor bolalarning hayotini saqlab qolish, shuningdek, jamiyatda insonparvarlik va mehr-oqibat gʻoyalarini targʻib qilishdan iboratdir. Bundan tashqari, aksiya bemor insonlarga qon quyish uchun xavfsiz qonning muhimligi, donorlarining jamiyat uchun zarurligi, qolaversa, koʻngilli donorlarning insoniyat oldidagi xizmatlarini ragʻbatlantirib borishni oʻz ichiga qamrab oladi.

Aytish joizki, aksiyada qatnashgan koʻngilli donorlar 18 dan 60 yoshgacha boʻlgan sogʻlom insonlardir. Ular tibbiy tekshiruvdan oʻtkazilib, shifokor tavsiyasiga binoan donor boʻlishdek savobli ishda ishtirok etdilar.

Kasalliklarining oʻz vaqtida aniqlanishi, zamonaviy kimyoviy terapiyalarning oʻtkazilishi natijasida bemorlarda koʻplab qon va qon mahsulotlariga zaruriyat seziladi, — deydi viloyat qon quyish markazi bosh shifokori Mirzohid Oʻroqov. — Partiya tashabbusi bilan oʻtkazilayotgan bunday xayrli tadbirning anʼanaviy tarzda davom etishi bizni behad quvontiradi. Mazkur begʻaraz donorlik aksiyasida turli kasalliklar yoki baxtsiz hodisalar tufayli qonga muhtoj boʻlgan bemor bolajonlarga hayot bagʻishlash va ularning sogʻayib ketishlariga hissa qoʻshishdek xayrli va savobli ishga bel bogʻlagan harbiy xizmatchi va xodimlar ixtiyoriy ravishda qon topshirdilar.

Aksiya ishtirokchilari taʼkidlaganidek, sogʻlom kishi uchun qon topshirish, albatta, xavfsiz shu bilan birga, foydalidir. Begʻaraz donorlik — kimningdir salomatligi, uning hayoti uchun hadya etiladigan bebaho neʼmat. Ayniqsa, bolalarning salomatligiga qaratilgan boʻlsa, savob qilishga yanada kuchliroq undaydi.

Tadbir davomida partiya tashabbusi bilan tashkil etilgan aksiyada koʻngilli ravishda bemor bolajonlar hayotini saqlab qolish uchun oʻz qonini topshirgan fuqarolarga partiyaning tashakkurnomasi va esdalik sovgʻalari topshirildi.

Gulshod Tursoatova,

Oʻzbekiston “Adolat”SDP

Surxondaryo viloyat Kengashi matbuot kotibi.