Qоnunlardagi ziddiyatlar inson foydasiga hal boʻlishi shart

Mazkur yangi tahrirdagi Oʻzbekiston Respublikasi Konstitutsiyasi 2023 yil 30 aprel kuni oʻtkazilgan Oʻzbekiston Respublikasi referendumida umumxalq ovoz berish orqali qabul qilindi. Oʻzbekiston Respublikasining amaldagi Konstitutsiyasi 6 boʻlim, 27 bob, 155 moddadan iborat boʻldi. Konstitutsiyada Oʻzbekiston huquqiy davlat deb belgilandi. Jumladan, inson huquq va erkinliklarini taʼminlash davlatning oliy maqsadi, deya eʼlon qilinar ekan, unda inson huquqlariga oid normalar 3 baravardan ortiqqa oshirildi.

Bugun “Adolat” SDP Qashqadaryo viloyat Kengashi tomonidan “Huquqiy davlatda inson huquqi qonun himoyasida” mavzusida tadbir boʻlib oʻtdi. Viloyat kengashi binosida uyushtirilgan tadbirda xalq deputatlari viloyat va shahar Kengashi deputatlari, partiya faollari, oʻqituvchilar, yoshlar vakillari qatnashdi. Unda xalq deputatlari viloyat Kengashi deputati Ruiddin Raupov kun tartibidagi masala yuzasidan maʼruza qildi.

-Inson huquq va erkinliklari qonunlarimizning, har bir vazirlik va idora faoliyatining mazmuniga aylanishi qatʼiy talab sifatida belgilanyaptiki, bu hol davlat organlari hamda mansabdor shaxslarning faqat va faqat fuqarolarning manfaatlarini koʻzlab faoliyat koʻrsatishiga asos boʻladi,-dedi Ruiddin Raupov.- Binobarin, qonunlardagi ziddiyatlar va noaniqliklar inson foydasiga hal boʻlishi shart va zarur. Bunga koʻra, inson va davlat oʻrtasida munosabatlarni tartibga soluvchi qonunchilikdagi noaniqliklar, turli tushunmovchiliklar bartaraf etiladi, fuqarolarning ortiqcha ovoragarchiliklari oldi olinadi. Konstitutsiyada davlat organlari tomonidan insonga nisbatan qoʻllaniladigan huquqiy taʼsir choralari mutanosiblik prinsipiga asoslanishi va qonunlarda nazarda tutilgan maqsadlarga erishish uchun yetarli boʻlishi kerakligi mustahkamlandi. Qonunchilikda belgilanmagan majburiyat hech kimning zimmasiga oʻz roziligisiz yuklatilishi mumkin emasligi qayd etilyaptiki, ushbu norma odamlar hayotini yanada yengillashtiradi.

Shuningdek tadbirda mavzu yuzasidan soʻzga chiqqan viloyat Kengashi bosh mutaxassisi Dilrabo Choriyeva, Nodir Isomov hamda xalq deputatlari Qarshi shahar Kengashi deputati Xusniddin Berdimurodovlar Oʻzbekiston Respublikasi fuqarosi Oʻzbekistondan tashqariga majburiy chiqarib yuborilishi yoki boshqa davlatga berib yuborilishi mumkin emasligi, bu norma fuqarolarimizning doimiy ravishda davlat himoyasida ekanligiga ishonchini mustahkamlashga, oʻz yurtidan chiqarib yuborilishi yoki boshqa davlatga berilishi kabi holatlarning oldini olishga xizmat qilishi, davlatimiz xorijda yashayotgan vatandoshlar bilan aloqalarning saqlab qolinishi hamda rivojlanishi toʻgʻrisida gʻamxoʻrlik qilishi, ushbu norma chet ellarda yashayotgan, ishlayotgan, taʼlim olayotgan vatandoshlarimizni Vatani bilan doimiy aloqada boʻlishiga, tili, madaniyatini saqlab qolish hamda rivojlantirishiga, ona yurti – Oʻzbekistonning obroʻsini yanada oshirishga oʻz hissasini qoʻshishiga xizmat qilishi haqida tushuncha berdilar.

Xulosa qilib aytganda, inson huquqlari barchamiz uchun eng oliy qadriyat hisoblanganligi bois, har birimiz fuqarolarning huquq va qonuniy manfaatlarini himoya qilishda bor kuch gʻayratimizni ishga solishimiz va bu borada jamiyatimizda amalga oshirilayotgan islohotlarga munosib darajada oʻz hissamizni qoʻshishimiz maqsadga muvofiq boʻladi.

Gulnoza Radjabova,

“Adolat” SDP viloyat Kengashi raisi o‘rinbosari.