Robaxon Maxmudova qoraqalpog‘istonlik saylovchilar bilan uchrashdi

“Adolat” sotsial-demokratik partiyasidan O‘zbekiston Respublikasi Prezidentligiga nomzod Robaxon Maxmudova joriy yilning 19 iyun kuni Nukus shahrida qoraqalpog‘istonlik saylovchilar bilan uchrashdi.

Uchrashuvda nomzodning ishonchli vakillari, Qoraqalpog‘iston Respublikasi Jo‘qorg‘i Kengesi hamda mahalliy Kengash deputatlari, partiya Markaziy apparati va Qoraqalpog‘iston Respublikasi kengashi xodimlari, faollar, keng jamoatchilik va ommaviy axborot vositalari vakillari ishtirok etishdi. 

Uchrashuvni Prezidentlikka nomzodning ishonchli vakili ochib berdi va dastlab, yig‘ilganlarga nomzodning tarjimai holi va mehnat faoliyati xususida batafsil maʼlumotlar berdi.

So‘ngra “Adolat” sotsial-demokratik partiyasidan O‘zbekiston Respublikasi Prezidentligiga nomzod Robaxon Maxmudova saylovchilarni o‘z saylovoldi dasturining ustuvor yo‘nalishlari bilan yaqindan tanishtirdi.

Taʼkidlanganidek, dasturda ilgari surilayotgan g‘oya va maqsadlar O‘zbekiston “Adolat” sotsial-demokratik partiyasining dasturiy maqsadlariga har jihatdan hamohang bo‘lib, davlat va jamiyat hayotining barcha jabhalarida, adolat tamoyillarini barqaror taʼminlashni nazarda tutadi.

Jumladan, nomzod dasturida huquqiy davlat qurish, ijtimoiy adolatni qaror toptirish, milliy iqtisodiyot, ilm fan, innovatsiyalar va taʼlim sohasining barqaror o‘sishiga erishish, aholi salomatligini har tomonlama muhofaza qilish, fuqarolik jamiyatini rivojlantirish, atrof-muhitni asrash, xotin-qizlar va yoshlarning siyosiy faolligini oshirish kabi ustuvor vazifalar ilgari surilmoqda.

Prezidentlikka nomzod tadbir yakunida uchrashuv qatnashchilarining savollariga javob berar ekan, kutilayotgan saylov Yangi O‘zbekistonning ijtimoiy-siyosiy hayotida muhim voqea ekanini taʼkidladi.

Tadbirda Qoraqalpog‘iston Respublikasi Jo‘qorg‘i Kengesining qo‘mita raisi, Jo‘qorg‘i Kengesdagi O‘zbekiston “Adolat” SDP fraksiyasi rahbari Dao‘itbay Qurbaniyazov, To‘rtkul tumani “Yashnobod” mahalla fuqarolar yig‘ini raisi, Qoraqalpog‘iston Respublikasi Jo‘qorg‘i Kengesi deputati Uringul Allabergenova, Yoshlar parlamenti aʼzosi Dadaxan Hakimbayev, partiya faoli, huquqshunos Palmurza Xojabekovlar so‘z olib, partiyadan Prezidentlikka ko‘rsatilgan nomzod haqida, uning saylovoldi dasturi borasida o‘z fikr-mulohazalarini bildirishdi. Shuningdek, maʼruzachilar tadbir ishtirokchilarini bo‘lajak saylovda partiyadan ko‘rsatilgan nomzodni qo‘llab-quvvatlashga chaqirdilar.

"Adolat" SDP Matbuot xizmati