Robaxon Maxmudova qoraqalpogʻistonlik saylovchilar bilan uchrashdi

“Adolat” sotsial-demokratik partiyasidan Oʻzbekiston Respublikasi Prezidentligiga nomzod Robaxon Maxmudova joriy yilning 19-iyun kuni Nukus shahrida qoraqalpogʻistonlik saylovchilar bilan uchrashdi.

Uchrashuvda nomzodning ishonchli vakillari, Qoraqalpogʻiston Respublikasi Joʻqorgʻi Kengesi hamda mahalliy Kengash deputatlari, partiya Markaziy apparati va Qoraqalpogʻiston Respublikasi kengashi xodimlari, faollar, keng jamoatchilik va ommaviy axborot vositalari vakillari ishtirok etishdi. 

Uchrashuvni Prezidentlikka nomzodning ishonchli vakili ochib berdi va dastlab, yigʻilganlarga nomzodning tarjimai holi va mehnat faoliyati xususida batafsil maʼlumotlar berdi.

Soʻngra “Adolat” sotsial-demokratik partiyasidan Oʻzbekiston Respublikasi Prezidentligiga nomzod Robaxon Maxmudova saylovchilarni oʻz saylovoldi dasturining ustuvor yoʻnalishlari bilan yaqindan tanishtirdi.

Taʼkidlanganidek, dasturda ilgari surilayotgan gʻoya va maqsadlar Oʻzbekiston “Adolat” sotsial-demokratik partiyasining dasturiy maqsadlariga har jihatdan hamohang boʻlib, davlat va jamiyat hayotining barcha jabhalarida, adolat tamoyillarini barqaror taʼminlashni nazarda tutadi.

Jumladan, nomzod dasturida huquqiy davlat qurish, ijtimoiy adolatni qaror toptirish, milliy iqtisodiyot, ilm fan, innovatsiyalar va taʼlim sohasining barqaror oʻsishiga erishish, aholi salomatligini har tomonlama muhofaza qilish, fuqarolik jamiyatini rivojlantirish, atrof-muhitni asrash, xotin-qizlar va yoshlarning siyosiy faolligini oshirish kabi ustuvor vazifalar ilgari surilmoqda.

Prezidentlikka nomzod tadbir yakunida uchrashuv qatnashchilarining savollariga javob berar ekan, kutilayotgan saylov Yangi Oʻzbekistonning ijtimoiy-siyosiy hayotida muhim voqea ekanini taʼkidladi.

Tadbirda Qoraqalpogʻiston Respublikasi Joʻqorgʻi Kengesining qoʻmita raisi, Joʻqorgʻi Kengesdagi Oʻzbekiston “Adolat” SDP fraksiyasi rahbari Daoʻtbay Qurbaniyazov, Toʻrtkul tumani “Yashnobod” mahalla fuqarolar yigʻini raisi, Qoraqalpogʻiston Respublikasi Joʻqorgʻi Kengesi deputati Uringul Allabergenova, Yoshlar parlamenti aʼzosi Dadaxan Hakimbayev, partiya faoli, huquqshunos Palmurza Xojabekovlar soʻz olib, partiyadan Prezidentlikka koʻrsatilgan nomzod haqida, uning saylovoldi dasturi borasida oʻz fikr-mulohazalarini bildirishdi. Shuningdek, maʼruzachilar tadbir ishtirokchilarini boʻlajak saylovda partiyadan koʻrsatilgan nomzodni qoʻllab-quvvatlashga chaqirdilar.