Semizlik - koʼplab kasalliklar debochasi

Inson salomatligi doimo hamma narsadan ustun boʼlib kelgan. Zero, bu bebaho neʼmat bizlarga oʼzimiz va yaqinlarimizga gʼamxoʼrlik qilishimiz, jamiyatning faol aʼzosiga aylanishimiz uchun juda zarur.

Salomatlikni asrash, jismoniy faollik esa bizni nafaqat bardam, ruhan tetik boʼlishimizni taʼminlaydi, balki koʼplab kasalliklarning oldini olishga xizmat qiladi. Davlatimiz rahbarining 2020 yil 30 oktyabrdagi “Sogʼlom turmush tarzini keng tatbiq etish va ommaviy sportni yanada rivojlantirish chora-tadbirlari toʼgʼrisida”gi Farmoniga koʼra, joriy yilning 1 iyulidan boshlab semizlikka qarshi kurash boshlandi.

Unga asosan, vazirlik, idora, korxona, tashkilot, mahalliy davlat hokimiyati organlarida faoliyat olib borayotgan rahbar va xodimlarning antropometrik koʼrsatkichlarini (semizlik darajasi, vazn indeksi), boshqa oʼtkir kasalliklarni keskin kamaytirish, salomatlikni mustahkamlash baholash mezonlarini ishlab chiqib, reyting asosida tahlil qilish hamda natijalarni onlayn kuzatib borish tizimi joriy etilgan. Bu oʼrinda eng avvalo, tashkilot rahbarlari oʼrnak koʼrsatishi, xodimlari oʼrtasida bu borada tizimli ishlar olib borilishini taʼminlashi lozim boʼladi.

Inson tanasida ortiqcha vazn koʼpaygani sayin ichki aʼzolar faoliyati qiyinlashib boraveradi. Masalan, yurak qon haydashga, jigar zaharlarni tozalashga, endokrin bezlar esa organizmni kerakli miqdordagi gormonlar bilan taʼminlashga qiynaladi. Ortiqcha vazn va semizlik salomatlikka salbiy taʼsir koʼrsatib, bir qator surunkali kasalliklarga sabab boʼlishi mumkin. Shunday ekan u bilan kurashish aslida aholi oʼrtasida uchrayotgan koʼpgina kasallikka qarshi kurashish demakdir.

Bugungi kunda oʼtkazib kelinayotgan “5000 qadam” ommaviy piyoda yurishlar fuqarolarning jismoniy faolligini oshirishga qaratilganligini bilan ahamiyatlidir. Аslida badantarbiya mashqlari har bir fuqaroning kundalik yumushiga aylanishi lozim. Maʼlum bir masofani piyoda bosib oʼtish, toza ichimlik suvi isteʼmoli, toʼgʼri ovqatlanish, tongi yugurishlar - bularning barchasi salomatlik uchun nihoyatda zarur hamda semizlikni oldini olishda muhim omil sanaladi. Toza havoda sayr qilish, ish jarayonida ham vaqti-vaqti bilan foydali mashqlarni bajarib turish tavsiya etiladi.

Kasallikka qarshi kurashgandan koʼra uning oldini olgan afzal, deya koʼp bora taʼkidlaymiz. Semizlik ham koʼplab kasalliklar debochasi. Unga qarshi kurashsak, oʼzimizni turli dardlardan asragan boʼlamiz.

Oʼz salomatligimizni oʼzimiz muhofaza qilaylik!

Аzamat АBDURАHMONOV,

Fargʼona viloyat sogʼliqni saqlash boshqarmasining bosh mutaxassisi,

Oʼzbekiston Respublikasi Oliy Majlis Senati huzuridagi “Yoshlar parlamenti” aʼzosi.