Sening tashabbusing-sening kelajaging

“Adolat” SDP Jarqoʻrgʻon tuman Kengashi va partiya tuman “Ayollar qanoti” Kengashi tomonidan Jarqoʻrgʻon biznes va yengil sanoat texnikumida talaba qizlar ishtirokida “Sening tashabbusing-sening kelajaging” mavzusida maʼnaviy-maʼrifiy tadbir oʻtkazildi.

Tadbirda partiya tuman Kengashi va partiya tuman “Ayollar qanoti” Kengashi faollari, deputatlar, oʻquv yurti pedagog –oʻqituvchilari, BPT faollari, ota-onalar va talaba yoshlar ishtirok etishdi.

Tadbirda soʻz olganlar texnikum talaba qizlarini ilmiy va innovatsion faoliyat bilan shugʻullanishga jalb qilish, ilmiy-tadqiqot natijalarini hayotga tatbiq etish, tadbirkorlikni rivojlantirish, iqtidorli qizlarning ijodiy salohiyatini qoʻllab-quvvatlash, kasb-hunarlarga oʻqitish, ularning bandligini taʼminlash hamda ijtimoiy faolligini oshirish yuzasidan fikr mulohazalarni bildirib oʻtishdi.

Tadbirda mamlakatimizda xotin-qizlarning huquq va qonuniy manfaatlarini himoya qilish, ularning iqtisodiy, ijtimoiy va siyosiy faolligini oshirish boʻyicha tizimli ishlar amalga oshirilayotgani qayd etildi.

Shundan soʻng yurtimizda qizlarning taʼlim olishi ularni har tomonlama yetuk insonlar, jamiyat tarbiyachilari boʻlib ulgʻayishlari uchun yaratilayotgan shart-sharoit va imkoniyatlar haqida soʻz bordi. Qizlar bilan rahbar ayollarning ishda va oilada oʻzini qanday tutishi hamda jamiyatda hurmatli ayol qanday boʻlishi kerakligi xususida suhbat qurildi.

Gavhar Yangiboyeva, partiya tuman “Ayollar qanoti” Kengashi faoli, tadbir ishtirokchisi:-Taʼkidlanganidek, forumni oʻtkazishdan asosiy maqsad talaba qizlarni har tomonlama qoʻllab-quvvatlash, ularning kiyinish va nutq madaniyatini oshirish, yoshlar ongini yot gʻoyalardan va illatlardan asrash, sogʻlom turmush tarzini targʻib etish, ularni turmushga tayyorlashdir. Ishtirokchilar oʻquv yurtida taʼlim olayotgan ziyrak, iqtidorli va isteʼdodli qizlarning qoʻl mehnati yordamida yasagan buyumlari koʻrgazmasi bilan tanishdi. Tadbir davomida oʻqishda va jamoat ishlarida tengdoshlariga oʻrnak boʻlayotgan qizlarning yutuqlari haqida soʻz yuritilib, ularning ota-onalariga oʻquv yurti maʼmuriyati tomonidan tashakkurnomalar topshirildi. Oʻz navbatida, ota-onalar talaba yoshlarning taʼlim olishi, oʻz iqtidorini namoyon etishi uchun yaratilgan shart-sharoitlarni eʼtirof etib, oʻz minnatdorchiligini bildirdi.

Tadbirda texnikum yoshlari tomonidan tayyorlangan konsert dasturi namoyish etildi.

Qizlarshoy Rahmatova,

Xalq deputatlari Jarqoʻrgʻon tuman Kengashi deputati.