Sifatsiz dorilardan saqlaning

Tan olish kerak, bugun aholi gavjum joylarda qadamiga dorixona. Bir qarashda bu yaxshi. Biroq ularda sotilayotgan dorilarning narxi har xil. Yana ayrim hollarda sifatsiz dori vositalari savdosiga yoʻl qoʻyilayotganidan ham koʻz yumish qiyin. Bu doim eʼtibordagi masalaga aylangani ham bor gap.

Albatta muammoning yechimi birgina masʼullar zimmasidagi vazifa emas. Buning uchun jamoatchilik ham birgalikda kurashmogʻi zarur. Andijon tuman koʻp tarmoqli markaziy poliklinikadagi “Adolat” SDP boshlangʻich partiya tashkiloti faollari tomonidan Kuyganyor shaharchasida tashkil etilgan tadbir ayni shu maqsadga qaratildi.

Bugun 82 nafar partiya aʼzolarini birlashtirgan mazkur BPT Andijondagi eng faol quyi tashkilotlardan. Partiyadoshlarimiz asosan tibbiyot xodimlari. Jamoatchilik orasida sogʻlomlashtirish va tibbiy madaniyatni oshirish barobarida huquqiy savodxonlik borasida ham faol ish olib boradilar. Shu sabab aholi ularni “adolatchi-shifokorlar” deb ataydi.

-Toʻgʻri, sifatsiz va qalbakilashtirilgan dori vositalaridan foydalanishni oldini olish borasida sezilarli ishlar qilinmoqda,-deydi BPT raisi Nilufar Qosimova.- Shunga qaramay fuqarolarni bu boradagi bilimlarini oshirish zarur. Bugun biz ana shunday shior bilan chiqdik. Birinchi navbatda tibbiy muassasamizga kelgan bemorlar bilan suhbatlar tashkil etildi. Shifokor retseptisiz dorilarni sotib olmaslik va ishonchliligiga eʼtibor qaratish tushuntirildi. MFYlardagi suhbatlar ham qizgʻin kechdi. Bu borada dorixonalarga ham kirib bordik.

Ayrim tadbir ishtirokchilari dorilarning narxiga jiddiy eʼtiroz bildirdilar. Hamon bir turdagi dori vositalari dorixonalarda turlicha narxlarda sotilayotgani tilga olindi. Bu borada jamoatchilik nazoratini kuchaytirish lozim. Ijobiy yechim topishning ishonchli yoʻllaridan biri dorixonalar faoliyatini qonun doirasida tartibga solishdan iborat. Oʻz oʻrnida dorixona xodimlarining masʼuliyatini ham oshirish zarur.

Mohidil Rustamova, nafaqaxoʻr-tadbir ishtirokchisi:

-“Adolatchilar”ning bu tashabbusini qoʻllab-quvvatlayman. Sifatsiz dorilardan saqlanish uchun birinchi navbatda fuqarolarning tibbiy va huquqiy madaniyatini oshirish kerak. Chunki oʻz huquqini bilgan inson aldanmaydi. Yana shifokor maslahatiga quloq tutish inson salomatligining asosi. Agar oʻz bilganimizcha yoʻl tutsak sogʻlom boʻlish oʻrniga kasallik oshirib olishimiz mumkin.

Yasharbek Soliyev, tadbir ishtirokchisi:

-Hayotimizga reklamalar shu qadar chuqur kirib bordiki buni inkor etib boʻlmaydi. Biroq dori vositalarining reklamasini jiddiy nazoratga olish zarur. Bilib bilmay reklamaga ishonib dorilarni isteʼmol qilish salbiy natijaga olib kelishi mumkin. Har kimga dorilar turlicha taʼsir qiladi. Bugun bu borada oʻzimizni qiynayotgan koʻp savollarga javob topdik.

Ha. dardga chalinganda har qanday dori malhamdek koʻrinadi. Biroq bu notoʻgʻri. Shifokor koʻrsatmasisiz dori vositalarini isteʼmol qilmang. Bu oʻzingiz uchun foydali.

“Adolat” SDP Andijon viloyat kengashi

Matbuot xizmati.