Strategiya: xotin-qizlarga oid maqsad-vazifalar keng targʻib etilmoqda

Kelgusi 7 yillik taraqqiyotimizga xizmat qiladigan muhim hujjat — “Oʻzbekiston – 2030” strategiyasida koʻplab yoʻnalishlardagi maqsad-vazifalar qatorida xotin-qizlar masalasiga ham alohida eʼtibor qaratilib, muayyan chora-tadbirlar oʻz ifodasini topgan.

Strategiyada ilgari surilgan xotin-qizlarga oid maqsad-vazifalarni keng jamoatchilikka, ayniqsa, ayol-qizlarimizga yetkazish maqsadida “Adolat” SDP Siyosiy kengashi Markaziy apparati tashabbusi bilan Toshkent toʻqimachilik va yengil sanoat instituti qoshidagi akademik litseyda “Oʻzbekiston — 2030” strategiyasida xotin-qizlar masalasi” mavzusida tadbir oʻtkazildi. 

Tadbirda “Oʻzbekiston — 2030” strategiyasining mazmun-mohiyati, unda aks etgan ustuvor maqsadlar, xususan, xotin-qizlarga oid masalalar haqida toʻxtalib oʻtildi.

— Strategiya jamiyat hayotining barcha jabhalarida gender teng huquqlilikka erishish yoʻlidagi boshlangan islohotlarimizni yangi bosqichga olib chiquvchi dasturilamal hujjat boʻldi, — dedi “Adolat” SDP Siyosiy kengashi raisi oʻrinbosari Abdukamol Rahmonov. — Ayniqsa, unda xotin-qizlarni qoʻllab-quvvatlash tizimini kuchaytirish, ularning huquq va qonuniy manfaatlarini taʼminlash, ijtimoiy, iqtisodiy, siyosiy faolligini oshirish va gender tenglikni taʼminlash yoʻnalishida qator maqsadlar koʻzlangani eʼtiborga molik. Ushbu vazifalarning ijrosi taʼminlanishi yurtimizda xotin-qizlar siyosatiga oid amaliy saʼy-harakatlar natijadorligiga xizmat qiladi. Shunday ekan, bu jarayonda bizning partiyamiz faollari va barcha darajadagi deputatlarimiz ham Strategiyani toʻlaqonli amaliyotga tatbiq etishda faol ishtirok etishi, tashabbuskor boʻlishi lozim.

Tadbir davomida Oliy Majlis Qonunchilik palatasi deputati Gulruh Aʼzamova “Oʻzbekiston – 2030” strategiyasida xotin-qizlar masalasi” mavzusida maʼruza qildi. Deputat bugungi kunda xotin-qizlarimizning barcha sohalardagi ulushi ortib borayotgani, ularga keng imkoniyatlar yaratilayotganini qayd etdi.

Tadbirda Strategiya ijrosini taʼminlash borasida kelgusidagi vazifalar belgilab olindi.