Strategiyadagi maqsad va vazifalar — taraqqiyotimiz kafolati

Oʻzbekiston “Adolat” SDP Surxondaryo viloyat “Ayollar qanoti” Kengashi tomonidan Termiz shahrida joylashgan 31-sonli davlat maktabgacha taʼlim tashkilotida davlatimiz rahbarining “Oʻzbekiston – 2030” strategiyasi toʻgʻrisida”gi farmoni hamda “Oʻzbekiston – 2030” strategiyasini 2023-yilda oʻz vaqtida va sifatli amalga oshirish chora-tadbirlari toʻgʻrisida”gi qarorida belgilangan vazifalar toʻgʻrisida davra suhbati tashkil etildi. Unda partiyaning “Ayollar qanoti” Kengashi faollari, deputatlar, maktabgacha taʼlim tashkiloti xodimlari, BPT aʼzolari ishtirok etishdi.

Tadbirda maʼruzachilar tomonidan xalqimizning xohish irodasini oʻzida aks ettirgan mazkur muhim hujjat soʻnggi yetti yilda amalga oshirilayotgan islohotlarimizni sifat jihatdan yangi bosqichga olib chiqishi va shu asosda aholining turmush darajasini yuksaltirish, mamlakatimiz taraqqiyotini taʼminlashda muhim ahamiyat kasb etishi aytib oʻtildi.

Shuningdek, strategiya Yangi Oʻzbekistonni barpo etishda, adolat, qonun ustuvorligi, xavfsizlik va barqarorlikni kafolatli taʼminlashda “Yoʻl xaritasi” vazifasini oʻtashi, qolaversa, Farmonda “Oʻzbekiston–2030” strategiyasini amalga oshirish va uning maqsadli koʻrsatkichlariga erishish barcha davlat organlari va tashkilotlari faoliyatida eng ustuvor vazifa etib belgilanganligi toʻgʻrisida tushuntirishlar berib oʻtishdi.

Shohista Normamatova, BPT aʼzosi, tadbir ishtirokchisi:

- Tadbirda “Oʻzbekiston – 2030” strategiyasida beshta ustuvor yoʻnalish boʻyicha 100 ta muhim maqsad qamrab olingani taʼkidlandi. Xususan, barqaror iqtisodiy oʻsish orqali daromadi oʻrtachadan yuqori boʻlgan davlatlar qatoridan oʻrin olish, aholi talablariga va xalqaro standartlarga toʻliq javob beradigan taʼlim, tibbiyot va ijtimoiy himoya tizimini tashkil qilish, aholi uchun qulay ekologik sharoitlarni yaratish, mamlakatning suvereniteti va xavfsizligini kafolatli taʼminlash kabi gʻoyalar aks ettirilganligi eʼtirof etildi. Muloqot davomida mazkur hujjat orqali inson qadrini ulugʻlash, xalqimizni rozi qilish, munosib turmush sharoiti bilan taʼminlash kabi ulkan maqsad va marralar koʻzlanganligi taʼkidlandi.

Tadbir soʻnggida ishtirokchilar oʻzlarini qiziqtirgan savollariga tegishlicha javoblar olishdi.

Nazokat Xidirova,
Oʻzbekiston “Adolat” SDP
Surxondaryo viloyat Kengashidagi
“Ayollar qanoti” Kengashi raisi