Surxondaryoda imzo yigʻish jarayoni qizgʻin davom etyapti

Maʼlumki, Oʻzbekiston “Adolat” SDP tomonidan Prezident saylovida ishtirok etish uchun saylovchilarning imzolarini yigʻish ishlari olib borilyapti. Xususan, Partiyaning barcha hududiy Kengashlarida partiya vakillari va aʼzolari, deputatlar,faollar ishtirokida saylovchilarning imzosini toʻplash ish, xizmat, oʻqish, yashash joyida, shuningdek boshqa joylarda amalga oshirilmoqda.Jumladan, partiyaning Surxondaryo viloyat Kengashi vakillari tomonidan ham imzo yigʻish jarayoni qizgʻin davom etyapti. Saylov kodeksiga muvofiq, siyosiy partiya nomzodni qoʻllab-quvvatlab, jami saylovchilarning umumiy sonining kamida bir foizini toʻplashi nazarda tutilgan.

Isroil Qurbonov, partiya viloyat Kengashi raisi oʻrinbosari:

Imzolarni oʻz vaqtida toʻplash masalasi belgilangan talablarga muvofiq ravishda samarali tashkil etilmoqda. Bunda saylovchilarga imzo varaqalarini toʻldirish tartib-taomillari aniq-ravshan tushuntirilmoqda. Shuningdek, partiya hududiy Kengashlaridagi masʼul xodimlar tomonidan imzo varaqalarining tegishli shaxslar va muayyan hududdagi partiya tuman (shahar) tuzilmalari rahbarlari tomonidan tasdiqlanishi ustidan nazorat oʻrnatilgan.

Shuningdek, partiyaning hududlardagi vakillari tomonidan viloyatning barcha tumanlarida imzo yigʻish jarayonlari yuqori uyushqoqlik bilan tashkil etilmoqda.

Gulshod Tursoatova,

“Adolat” SDP Surxondaryo viloyat Kengashi matbuot kotibi.