Surxondaryoda sanoat rivojlanadigan boʻldi

Prezidentimiz Shavkat Mirziyoyev viloyatimizga tashrifi chogʻida Termiz tumani Yangiobod mahallasidagi “Termez National Carpets” masʼuliyati cheklangan jamiyatining gilam ishlab chiqarish jarayoni bilan tanishib, shu yerda videoaloqa orqali oltita yangi ishlab chiqarish korxonasini ishga tushirdi. Bu jarayon tarixiy voqea boʻldi desam, mubolagʻa boʻlmaydi. Sababi, aksariyati “Ayollar daftari” ga kiritilgan va tikuvchilik hamda milliy hunarmandchiligimizga qiziquvchi xotin-qizlar ish bilan taʼminlashi vohamiz ayollari sirasida meni ham juda quvontirdi. Deputat sifatida aholi bilan yuzma yuz muloqotlarda juda koʻpchilik ayollarimizning uyda bekor oʻtirganligi sabab ish bilan band qilish yuzasidan qilingan murojaatlar va ish bilan taʼminlash muammolari meni qiynab kelar edi. Ayollarimizni, qizlarimizni ish bilan taʼminlash muammolari bartaraf boʻlishi meni juda quvontirdi. Men bu korxonalarning ishga tushirilishidan juda xursand boʻldim. Prezident tashrifi meni juda ruhlantirdi, yanada faollikka undadi. Bularning barchasi mamlakatimizda aholi bandligini taʼminlab, ayniqsa surxondaryolik hunarmand, chevar ayollarimizning turmush darajasini oshirishga qaratilayotgan yuksak eʼtibor va buyuk ajdodlardan meros qolgan milliy hunarmandchiligimizni yanada rivojlantirib, dunyoga keng namoyish etishga yoʻnaltirilgani bilan ahamiyatlidir.

Aytish joizki, oxirgi besh yilda viloyat sanoatiga 30 trillion soʻm investitsiya jalb qilinib, 5 mingdan ziyod korxona tashkil topdi. Ishlab chiqarish 3 baravar koʻpayib, sanoat eksporti rivojlandi. Surxondaryoda ilgari boʻlmagan qurilish materiallari, charm-poyabzal, elektr texnikasi kabi yangi tarmoqlar paydo boʻldi. Shu bilan birga, viloyatda hali foydalanilmagan imkoniyatlar koʻp.Tashrif chogʻida joriy yilda 292 ta sanoat loyihasi ishga tushirilishi belgilandi. Bu 10 mingta yangi ish oʻrni yaratish imkonini beradi. Shuningdek, Prezidentimiz tomonidan sanoatda importni 50 million dollarga qisqartirib, eksportni kamida 250 million dollarga yetkazish boʻyicha koʻrsatmalar berildi. Eng muhim jihat shuki, bu vazifalar amalga oshirilsa, 325 ming aholi daromadli mehnat bilan taʼminlanib, Surxondaryo kambagʻallik va ishsizlikdan xoli hududga aylanadi. Bu haqda davlatimiz rahbari fikr yuritib, hokimlar xalq bilan birgalikda ishlab, ularning muammolari, orzu oʻylari va tashabbuslarini qoʻllab-quvvatlasa, albatta, maqsadimizga yetishimiz muqarrar, dedi.

Prezidentimizning tashrifidan kelib chiqib, partiya faoli sifatida yurtimizda xotin-qizlarni nafaqat hunarli, ishli qilish balki ularning jamiyatdagi mavqeyini koʻtarish, ilmli va maʼrifatli farzandlar tarbiyalashida koʻmaklashish, Yangi Oʻzbekistonda poydevori tashlanayotgan Uchinchi Renessansga munosib hissa qoʻshishni oʻz oldimga vazifa etib belgiladim. Partiyamizning Saylovoldi dasturida belgilangan gʻoya va maqsadlarga hamohang insonning farovon hayoti va manfaatlarini taʼminlashga qaratilgan bu kabi tizimli islohotlar, davlat va jamiyatni uygʻun va jadal rivojlantirish uchun shart-sharoit yaratishga intilishlar, mamlakatimizni taraqqiyotning yangi bosqichiga olib chiqishdek ulugʻvor maqsadlarni oʻzida mujassam etishi bilan ulkan ahamiyat kasb etadi. Endi ularning ijrosiga biz deputatlar ham bir chekkada qarab turmay kamarbasta boʻlish,, hech boʻlmaganda, berilayotgan imkoniyatlardan toʻgʻri foydalanish orqali jamiyat farovonligini taʼminlashda oʻz hissamizni qoʻshish va saylovchilarning bizga boʻlgan ishonchini qozonish oldimizda turgan zalvorli va ayni damda zamonning oʻzi talab etayotgan masʼuliyatli vazifadir.

Nazokat Xidirova,

Xalq deputatlari Termiz shahar Kengashi deputati.