Taʼlim muassasalarida kuz-qish mavsumiga tayyorgarlik qanday?

Tabiiyki, kunlar soviy boshlashi bilan isitish tizimiga katta ehtiyoj tugʻiladi. Elektr energiyasi va tabiiy gazga boʻlgan talab har doimgidan-da oshadi. Baʼzida nosoz va qoʻlbola isitish moslamalaridan foydalanish, xavfsizlik qoidalariga rioya qilmaslik yoki ehtiyotsizlik ortidan yongʻin bilan bogʻliq turli koʻngilsizliklar kelib chiqishi mumkin. Shu bilan bir qatorda joylarda kuz-qish mavsumiga tayyorgarlik ishlarida eʼtiborsizlikka yoʻl qoʻyilganda ham shunday holatlar roʻy beradi.

Xoʻsh, joriy mavsumni betalafot oʻtkazish boʻyicha taʼlim tizimida qanday chora-tadbirlar amalga oshirilmoqda? Ushbu savollarga javob olish maqsadida Oʻzbekiston “Adolat” SDP Surxondaryo viloyat Kengashi vakillaridan tarkib topgan ishchi guruhlari viloyat maktablaridagi vaziyatni oʻrganib chiqishmoqda.

Xususan, partiyaning Surxondaryo viloyat Kengashi xodimlari va Xalq deputatlari Termiz shahar Kengashi deputatlari boshchiligidagi ishchi guruh shahardagi umumtaʼlim maktablarining kuz-qish mavsumiga tayyorgarligi yuzasidan qilingan ishlarni oʻrgandi.

Oʻrganishlarga koʻra, Termiz shahar xalq taʼlimi boshqarmasi tasarrufidagi taʼlim muassasalarini 2023-2024-yil kuz-qish davrida ishlashga tayyorlash boʻyicha ishlab chiqilgan tadbirlar rejasiga muvofiq, mahalliy byudjet hisobidan mablagʻ yoʻnaltirilgan.

Viloyatda kuz-qish mavsumiga tayyorgarlik tadbirlari rejasini ishlab chiqish oldidan xalq taʼlimi tizimidagi 5,-6,- va -7 umumtaʼlim maktablari holati toʻliq oʻrganib chiqildi. Shunga muvofiq, bajariladigan ishlar aniq hisob-kitob qilinganligi aniqlandi.
Oʻrganishlarga koʻra shahar hokimligi tomonidan tasdiqlangan tadbirlar rejasi asosida mazkur maktablarda joriy taʼmirlash ishlari bajarilgan. Muassasalardagi isitish tizimlari bilan bogʻliq kamchiliklar birmuncha bartaraf etilib, binolarning tomi taʼmirlanib, singan oynalar yangilanganligi maʼlum boʻldi.

Kamchiliklar bartaraf etilayotgan boʻlsa-da, ammo kuz-qish mavsumiga oʻtish jarayonida kamchiliklarga yoʻl qoʻyayotgan umumtaʼlim maktablari borligi maʼlum boʻldi. Xususan, shahardagi 5-sonli umumtaʼlim maktabidagi oʻrganishlarda maktabda kuz-qish mavsumiga tayyorgarlik ishlari nihoyasiga yetmaganligi aniqlandi. Sinfxonalar mavsumga tayyorlanmagan. Isitish qozonxonasining taʼmirlanish darajasi ham qoniqarli emas. Temir quvurlar himoya vositasi bilan qoplanmagan. Baʼzi sinfxonalarning deraza oynalari singan, eshiklar zich yopilmaydi. Dudboʻronlar oʻt oʻchiruvchilar tomonidan tekshirilmaganligi aniqlandi. Shuningdek, 6,-7,-umumtaʼlim maktablaridagi tekshiruvlarda gaz bosimi pastligi, shahar oʻt oʻchiruvchilari tomonidan dudburonlar boʻyicha xulosa berilmaganligi maʼlum boʻldi.

 Abduqodir Mustafaqulov, Xalq deputatlari Termiz shahar Kengashi deputati:

-Shahardagi mutasaddi idoralar mutaxassislari, deputatlar, jamoatchilik vakillaridan iborat maxsus ishchi guruh xalq taʼlimi muassasalarini kuz-qish mavsumiga tayyorlash yuzasidan belgilangan chora-tadbirlar oʻz vaqtida amalga oshirilishini monitoring qilib bormoqda. Monitoring natijalari ishchi guruhning mahalliy hokimlik va tegishli rahbarlar ishtirokidagi yigʻilishida muhokama qilinib, yoʻl qoʻyilayotgan kamchiliklar yuzasidan bartaraf etish choralari koʻriladi.

Oʻrganish natijasida aniqlangan muammo va kamchiliklarni bartaraf etish boʻyicha deputatlar tomonidan taʼlim mutasaddilariga tushuncha va tavsiyalar berdi.

Nazokat Xidirova,

Xalq deputatlari Termiz shahar Kengashi deputati.