Taʼlim sifatini oshirish – Yangi Oʻzbekiston taraqqiyotining yakka-yu yagona toʻgʻri yoʻlidir

Oʻzbekiston Respublikasi Prezidenti Shavkat Mirziyoyevning Oliy Majlis va Oʻzbekiston xalqiga Murojaatnomasida Yangi Oʻzbekiston uchun eng katta investitsiya boʻlgan taʼlimni qoʻllab-quvvatlash masalalariga keng urgʻu berildi.

Shu bois, maktablarda taʼlim sifati, hamda jamiyatda oʻqituvchi kasbining nufuzini oshirish, muallimlarning sharoitlarini yaxshilash 2023-yildagi eng asosiy vazifalardan biri ekanligi yurtboshimiz tomonidan alohida eʼtirof etildi.

Oʻqituvchilarning maqomini, ularning shaʼni va qadr-qimmatini himoya qilishni Konstitutsiyada alohida belgilash, 2023-yildan maktab taʼlimini xalqaro taʼlim dasturlari asosida butunlay isloh qilishni boshlash lozimligi.Bu ishlarni tizimli yoʻlga qoʻyish, yangi darsliklarni ishlab chiqish, ilgʻor taʼlim standartlari va metodikalarini joriy etish uchun alohida ilmiy institut va laboratoriyalar tashkil qilinishi kerakligi , bu esa pedagoglar uchun katta masʼuliyat va mehnat talab qilishi tabiiy.

Ayni vazifalarni hayotga keng tatbiq qilish maqsadida Sirdaryo viloyat xalq taʼlimi boshqarmasining fidoiy oʻqituvchilar bilan ZOOM orqali seminar tashkil qilindi. Seminarda taʼlim sifati va oʻqituvchilarning bilim saviyasi, kasb mahoratini shakllantirish, oʻquvchilarni mustaqil fikrlash, dunyoqarashini kengaytirish, qolaversa, yoshlarimizni taʼlim-tarbiya olishida ota-onalarning masʼuliyatini oshirish va keng jamoatchilik bilan taʼlim sohasidagi muammo va kamchiliklarni bartaraf etish yuzasidan “Ustozlar Kengashi”ni tuzishga bagʻishlangan masala koʻrib chiqildi.

Jarayonda taʼlim sifatini oshirilishida metodik xizmatni kuchaytirishning chora-tadbirlari haqida gapirilib, unda tajribali va fidoiy oʻqituvchilarning ish tajribalaridan unumli foydalanish zarurligi eʼtirof etildi. Zero, Yangi Oʻzbekiston maktab ostonasidan boshlanar ekan, maktablarda taʼlimga boʻlgan munosabatni kuchaytirish, metodik xizmatni takomillashtirish, maktab taʼlimini isloh qilish, oʻquvchi va oʻqituvchilarning bilim saviyasini oshirishning zamonaviy usullarini qoʻllash va ularni qoʻllab quvvatlash shu kunning muhim masalalaridan biri ekanligi taʼkidlandi.

Nizom talablari va reja asosida tajribali fidoiy oʻqituvchilardan iborat “Ustozlar” Kengashi tuzilib unga xalq taʼlimi boshqarmasining metodik xizmat koʻrsatish boʻlimi boshligʻi Shahriddin Xolmurodov, kotibligiga esa Gulsara Davronovalar saylov asosida tayinlandilar.

Shu bugundan boshlab, Kengash oʻz ishini boshladi. Kengash raisi “Ustozlar” Kengashining maqsad vazifalari haqida gapirib, taʼlim sifatini oshirish uchun oʻqitish metodlarini kuchaytirish, zaruriy zamonaviy qoʻllanma va koʻrgazmalarni taʼlim muassasalariga yetkazib berish, ulardan unumli foydalanish zarurligi uqtirildi. Endigi vazifa shundan iboratki, “Ustozlar Kengashi” aʼzolari taʼlim muassasalarida boʻlib, oʻqituvchilarning faoliyatini oʻrganadilar va ularga metodik xizmat koʻrsatadilar. Yigʻilishda qatnashgan “Adolat” SDP aʼzosi, faxriy pedagog, viloyat Kengashi deputati S.Elmurodov koʻrib chiqilgan masalalar yuzasidan oʻz mulohazalarini va takliflarini bildirdi.

Xususan, 2023-yilning “Insonga eʼtibor va sifatli taʼlim yili”, deb eʼlon qilinishi fikrimizning yorqin ifodasidir. Mazkur yilga bunday nom berilishi biz, pedagoglardan yanada koʻproq oʻz ustimizda ishlashni va yosh avlod taʼlim-tarbiyasida masʼuliyatni yanada kuchaytirishimizni talab etadi. Yoshlarni tarbiyalashda nafaqat ustoz-murabbiylarning saʼy-harakatini kuchaytirish, balki oila, mahalla va taʼlim muassasalari birgalikda harakat qilishi maqsadga muvofiqdir.

Maʼlumotlarga koʻra, komil insonni tarbiyalashda uch omil asos boʻlib xizmat qiladi. Irsiy omillar – 10-15 foiz, atrof-muhit 40 foiz va maqsadga muvofiq tarbiya 45 foizni tashkil etar ekan. Demak, oʻz vaqtida tarbiyalangan shaxs taʼlimni ham keraklicha oʻz vaqtida oʻzlashtira oladi. Zero, ulugʻ alloma Abdulla Avloniy bobomiz taʼbiri bilan aytganda, “Tarbiya biz uchun yo hayot – yo mamot, yo najot – yo halokat, yo saodat – yo falokat masalasidir”.

Xulosa qilib aytganda, maqsadga muvofiq tarbiyalangan insonlar jamiyatning ajralmas qismiga aylanadi. Ularning taʼlim-tarbiyasi yurt gullab-yashnashi va xalqning tinch, farovon yashashi uchun xizmat qiladi.

"Adolat" SDP Sirdaryo viloyati
Matbuot xizmati.