Taʼlim tizimini korrupsiyadan tozalash lozim

“Adolat” sotsial-demokratik partiyasi Jizzax viloyat Kengashi tomonidan “Taʼlimda korrupsiyaga yoʻl bermaymiz” mavzusida davra suhbati tashkil etildi.

Oʻzbekiston Milliy Universiteti Jizzax filialining tadbirlar zalida boʻlib oʻtgan mazkur tadbirda partiyaning viloyat Kengashi xodimlari, deputatlar, Jizzax viloyat prokuraturasi, Jizzax viloyat yuridik texnikumi, Oliy taʼlim muassasasi vakillari, talabalar, partiya faollari hamda OAV vakillari ishtirok etishdi.

Tadbirni ochib berish uchun soʻzga chiqqan partiyaning viloyat Kengashi raisi oʻrinbosari Poʻlat Hamzayev bugungi kunda dunyo hamjamiyati hayot faoliyatining barcha sohalarida koʻp qirrali oʻzgarishlar boʻlib oʻtmayotganligi, bu esa oʻz navbatida boʻlajak mutaxassislarni shakllantirishda yangicha yondashuvni talab etishini, bu esa butun dunyoda boʻlgani singari yurtimizda ham taʼlim maqsadlari sohasida kechayotgan oʻzgarishlar, insonning ijtimoiy olamga kirishini taʼminlashga qaratilgan global masalalarga mos kelishini taʼkidlab oʻtdi.

Ayniqsa, mamlakatimizda taʼlim sohasida amalga oshirilayotgan chora-tadbirlar zamirida ilm-fan ishlab chiqarish, uning moddiy asosini yaratish, texnologik rivojlantirish va eng asosiysi malakali kadrlar bilan taʼminlashda muhim omil boʻlib xizmat qilmoqda.

 Tadbirda Jizzax viloyat yuridik texnikumi kafedra mudiri Hojiakbar Muhamadiyev soʻzga chiqib, amalga oshirilayotgan islohotlarning barchasi yoshlarning oʻz ijodiy va intellektual salohiyatini roʻyobga chiqarish, zamon talablariga javob beradigan mehnat bozorida raqobatbardosh kadrlar tayyorlash uchun zarur shart-sharoitlar va imkoniyatlarni yaratish maqsadida amalga oshirilayotganligi aytib oʻtildi.

Haqiqatdan ham, taʼlim jarayonida yoshlarga taqdim etilayotgan bunday imkoniyatlar ertamiz egalari boʻlgan yosh avlodning oʻz salohiyatini toʻla namoyon etishi, oʻzi tanlagan kasb boʻyicha oʻqishi, ishlashi, hayotda oʻz oʻrnini topib olishi va jamiyat ravnaqiga munosib hissa qoʻshadigan mutaxassislar boʻlib yetishishi uchun mustahkam poydevor boʻlmoqda.

Shundan soʻng, tadbirda soʻzga chiqqan Jizzax viloyat prokuraturasi boʻlim prokurori Bunyod Joniqulov tomonidan mamlakatimizda uzluksiz taʼlim tizimining isloh qilinishi, yaʼni taʼlim standartlari asosida taʼlim va tarbiya jarayonini qayta tashkil etishga kirishilgan bir paytda ayrim kishilar tomonidan sodir etilgan jinoyatlar xususan, korrupsiya holatlari kelajakda yoshlar bilan bir qatorda davlat ravnaqiga, uning imijiga ham salbiy taʼsir qilishi, bunday salbiy holatlarni huquqni muhofaza qiluvchi davlat organlari bilan bir qatorda har bir fuqaro qatʼiy nazoratga olishi lozimligi eʼtirof etildi. Aks holda bu kabi korrupsiya holatlari mamlakatimizda olib borilayotgan taʼlim tizimidagi samarali islohotlarga toʻsiq boʻlishi shubhasiz.

Tadbir qizgʻin savol-javoblar, fikr-mulohazalarga boy boʻldi.

“Adolat” SDP Jizzax viloyat Kengashi Matbuot xizmati.