Targʻibot ishlari koʻlami kengaymoqda

Prezidentimiz Shavkat Mirziyoyevning 2022-yil 20-dekabrdagi Oliy Majlis va Oʻzbekiston Xalqiga Murojaatnomasining oltita ustuvor yoʻnalishlaridagi vazifalarni amalga oshirish hamda uning targʻiboti boʻyicha alohida Ishchi guruhlar tuzilib, ularning har biri uchun oʻz yoʻnalishida amalga oshirilishi lozim boʻlgan vazifalar belgilangan edi.

Shundan kelib chiqqan holda Oʻzbekiston “Adolat” SDP Surxondaryo viloyat Kengashi xodimlari, mahalliy Kengashlar deputatlari, BPT raislari uchun Murojaatnomani chuqur oʻrganishga bagʻishlangan turkum davra suhbatlari va oʻquv-seminarlar tashkil etilmoqda.

Xususan, partiyaning Uzun tuman Kengashi va “Ayollar qanoti” Kengashi tomonidan tumandagi “Yangi kuch” MFY fuqarolari ishtirokida tashkil qilingan navbatdagi tadbirda partiyaning Uzun tuman Kengashi va “Ayollar qanoti” Kengashi xodimlari, deputatlar, BPT raislari va faollar ishtirok etdilar.

Tadbirda Murojaatnomada belgilangan ustuvor yoʻnalishlar haqida toʻxtalib oʻtildi. Jumladan, “Ixcham va samarali davlat boshqaruv tizimiga oʻtish”, “Yangi Oʻzbekistonni “ijtimoiy davlat” tamoyili asosida qurish”, “Inson huquq va erkinliklarini ishonchli himoya qilish davlatning konstitutsiyaviy majburiyati”, “Ekologiya, qishloq va suv xoʻjaligi masalalari”, “Iqtisodiyotga mahalliy va xorijiy xususiy investitsiyalarni koʻpaytirish uchun sharoitlarni yanada yaxshilash”, “Ochiq va pragmatik, oʻzaro ishonch va hurmatga asoslangan tashqi siyosatni izchil davom ettirish, Milliy xavfsizlikni taʼminlash, Qurolli Kuchlarimiz jangovar salohiyatini oshirish” yoʻnalishlari boʻyicha belgilangan ustuvor vazifalar, ularning ijrosini taʼminlash mexanizmlari va huquqiy asoslari yuzasidan partiya faollari atroflicha maʼlumot va tushuntirishlar berishdi.

Shuningdek, soʻzga chiqqanlar “Insonga eʼtibor va sifatli taʼlim yili”da insonni sharaflash, uning qadri, shaʼnini oliy qadriyat deb bilish, orzu-niyatlarini amalga oshirish yoʻlida taʼlimning ahamiyati beqiyosligini taʼkidladi. Keyingi yillarda taʼlim-tarbiya tizimini rivojlantirish, oʻqituvchi kasbining maqomini oshirish, pedagoglar salohiyatini koʻtarish, ular uchun munosib shart-sharoitlar yaratish borasida qator ishlar amalga oshirilgani va bu islohotlar izchil davom etayotganidan koʻzlangan maqsad ham aslida taraqqiyotga erishish, inson qadrini yuksaltirish ekaniga urgʻu berildi.

Tadbirda Kengash deputatlari hamda maʼruzachilar tomonidan amalga oshirilayotgan targʻibot tadbirlari, davra suhbatlari va oʻquv-seminarlar haqida fikr va mulohazalar, xulosa va takliflar bildirilib, munozara va muhokamalarga, savol-javoblarga ham alohida eʼtibor qaratildi.

Zulayho Xoʻjamqulova,
Oʻzbekiston “Adolat” SDP Uzun tuman “Ayollar qanoti” Kengashi faoli