Tibbiyot xodimlarini himoyalash-ustuvor maqsad

Oʻzbekiston Respublikasi Prezidentligiga partiyamizdan koʻrsatilgan nomzod – Robaxon Maxmudovaning Surxondaryo viloyatidagi ishonchli vakili Rustam Hamroyev bilan Jarqoʻrgʻon tuman 5-sonli musiqa va sanʼat maktabi faollar zalida saylovchilar bilan uchrashuv tashkil etildi.

Uchrashuvda partiya viloyat va tuman Kengashi vakillari, mahallalar fuqarolari, BPTlar faollari, deputatlar hamda OAVlar vakillari ishtirok etishdi.

Uchrashuv avvalida ishonchli vakil nomzodning tarjimai holi bilan ishtirokchilarni tanishtirdi va Saylovoldi dasturidan munosib joy olgan xalqchil va ustuvor gʻoyalarning maqsad va vazifalari, mazmun va mohiyati toʻgʻrisida hayotiy misollar bilan tushuntirishlar berdi.

Nomzodning Saylovoldi dasturida Oʻzbekistonda tibbiyot xodimlarining maqomini qonun bilan belgilanishi, ularning ijtimoiy himoyasini kuchaytirish va ularga nisbatan turli tazyiqlarning oldini olish maqsadida qonunchiligimizni yanada takomillashtirish koʻzda tutilgan.

Shuningdek, reproduktiv salomatlik masalasi, onkologiya, sil, qand kasalliklarining oldini olish va davlat hisobidan davolash alohida diqqat-eʼtiborda boʻlishi ham muhim maqsad etib belgilangan.

Nomzodning ishonchli vakili mazkur maqsad va vazifalar haqida tushuntirishlar berib oʻtar ekan, dasturda Davlat hisobidan koʻrsatiladigan tibbiy xizmatlar va dori vositalari roʻyxatini takomillashtirish, ijtimoiy dorixonalarni rivojlantirish, ogʻir kasalliklarni davlat tomonidan davolashni kengaytirishni qoʻllab-quvvatlash, sogʻliqni saqlash sohasidagi ustuvor maqsadlardan yana biri qishloqda va taʼlim tizimida tibbiy xizmatni sifat jihatidan yangi bosqichga koʻtarish kabi muhim ahamiyat kasb etuvchi birqancha yoʻnalishlar qamrab olinganligini aytib oʻtdi.

Uchrashuv yakunida ishtirokchilar Oʻzbekiston Respublikasi Prezidentligiga “Adolat” sotsial-demokratik partiyasidan koʻrsatilgan nomzod Robaxon Maxmudovaning Saylovoldi dasturi yuzasidan oʻz fikr-mulohazalarini bildirdilar va oʻzlarini qiziqtirgan savollarga javoblar oldilar.

Vohamizda ishonchli vakilning uchrashuvlari davom etmoqda.

Gulshod Tursoatova,

Oʻzbekiston “Adolat” SDP

Surxondaryo viloyat Kengashi Matbuot kotibi.