Til borki, millat barhayot!

1989 yil 21 oktyabrda “Oʻzbekiston Respublikasining davlat tili haqida“gi qonuni qabul qilinishi va 21 oktyabr sanasining “Oʻzbek tiliga davlat tili maqomi berilgan kun” sifatida bayram qilinishi istiqlolimiz sari qoʻyilgan dadil qadamlardan biri sifatida tarixga muhrlandi hamda mustaqil Vatanimiz ijtimoiy-siyosiy, huquqiy, madaniy, maʼnaviy hayotidagi ulkan voqealardan biriga aylandi.

Bugungi kunda yurtimiz boʻylab mazkur sana munosabati bilan oʻtkazilayotgan tadbirlar har yilgidan oʻzgacha joʻshqinlik va koʻtarinkilik bilan tashkil etilmoqda. Mana shunday tadbirlardan biri Kogon shahar Xalq taʼlimi boʻlimiga qarashli ixtisoslashtirilgan umumtaʼlim maktabida tashkil etildi.

“Til borki, millat barhayot” mavzusida oʻtkazilgan mazkur maʼnaviy-maʼrifiy tadbirda partiyaning Kogon shahar Kengashi raisi Z.Tosheva, shahar Kengashining “Ayollar qanoti” raisi Adizova Dilfuza hamda ixtisoslashtirilgan maktabning oʻqituvchi va oʻquvchilari, partiya faollari ishtirok etishdi.

Tadbirda soʻzga chiqqanlar tomonidan soʻngi yillarida mamlakatimizda amalga oshirilayotgan keng koʻlamli islohotlar jarayonida davlat tilining hayotimizdagi oʻrni va nufuzi tobora oshib borayotgani, oʻzbek tili siyosiy-huquqiy, ijtimoiy-iqtisodiy, maʼnaviy-maʼrifiy jabhalarda faol qoʻllanib, xalqaro minbarlarda baralla yangrayotgani, xorijiy mamlakatlarda tilimizga eʼtibor va uni oʻrganishga qiziqish kuchayayotgani xususida oʻz fikr mulohazalarini bildirib oʻtishdi.

Darhaqiqat, bugungi globallashuv davrida har bir xalq, har qaysi mustaqil davlat oʻz milliy manfaatlarini taʼminlash, bu borada avvalo oʻz madaniyatini, azaliy qadriyatlarini, ona tilini asrab-avaylash va rivojlantirish masalasiga ustuvor ahamiyat qaratishi tabiiydir.

Shuni taʼkidlash kerakki, oʻzbek tiliga davlat tili maqomining berilishi xalqimizning milliy mustaqillikka erishish yoʻlidagi muhim qadamlaridan biri boʻlgan edi. Shunday ekan, ona tilimizning xalqaro miqyosdagi obroʻ-eʼtiborini yuksaltirishda, uni milliy va umumbashariy tushunchalar asosida taraqqiy etgan tillar safiga qoʻshishda har birimiz tilimizga chuqur hurmat bilan yondashimiz kerak.

Tadbir davomida maktab oʻquvchilari tomonidan ona tilimizni madh etib, aytilgan sheʼrlar, qoʻshiqlar hamda sahna koʻrinishlar barchaga xush kayfiyat bagʻishladi.

Mohigul Rahimqulova,

“Adolat” SDP Buxoro viloyat Kengashi matbuot kotibi.