Tizimli oʻzgarishlar oʻz natijasini beradi

Oʻzbekiston Respublikasi Prezidenti Shavkat Mirziyoyev hududlarda ijtimoiy-iqtisodiy islohotlarning ustuvor yoʻnalishlarini belgilab berish, xalq bilan muloqot qilish maqsadida Surxondaryo viloyatida boʻldi. Yashillik, koʻklam janubiy viloyat boʻlmish bizning vohamizdan boshlanishi bejizga emas. Viloyatimizda oʻziga xos dehqonchilik maktabi yaratilgan. Ziroatchilik madaniyati shakllangan.Surxondaryo deganda salohiyati ulkan, industriyaviy imkoniyatlarga boy boʻlgan voha koʻz oldingizga keladi. Shu bois davlatimiz rahbarining Surxondaryoga umuman tanti, mard va mehnatkash voha ahliga nisbatan mehr- muhabbati oʻzgacha. Shuning uchun ham Prezidentimiz har gal viloyatga kelib bir-biridan muhim loyiha va rejalar, katta-katta maqsadlar bilan keladi.

Vohaning keyingi olti yilda erishgan rejasi 25 yilda qoʻlga kiritgan yalpi hududiy mahsulotdan qariyb uch barobar koʻpayganligini eʼtirof etish mumkin. Avvallari voha sanoati haqida gap ketsa koʻpchilikning koʻz oldiga maʼlum bir sanoat obyektlari kelar edi. Maʼlumotlarga asoslansak, oʻtgan 2016-yilda vohada bor yoʻgʻi 25 674 ta korxona bor edi.Keyingi olti yilda esa ular soni 46 252 taga yetdi. 2016-yilda vohada ichimlik suvi taʼminoti 40 foizdan biroz yuqori boʻlgan boʻlsa oradan olti yil oʻtib 18 foiz oʻsishga erishildi.Yaʼni aholini toza ichimlik suvi bilan taʼminlash darajasi 58,6 foizga yetdi. Bosqichma bosqich boshqa ijtimoiy sohalar ham oʻzgarishlarga yuz tutdi. Xususan, maktabgacha taʼlim qamrovi keskin oshdi. 2016-yilda viloyatda atigi 294 ta maktabgacha taʼlim tashkiloti faoliyat koʻrsatgan boʻlsa , keyingi olti yilda qariyb oʻn baravarga koʻpayib 2444 taga yetdi. Prezidentimizning viloyatga amalga oshirgan tashriflaridan birida aytganlari: “Endi Surxondaryoliklar yili boʻladi”-degan fikrlari amalda oʻz isbotini topayotganligi shubhasizdir. Qisqa davrda vohada zamonaviy sement zavodlari, DSP ishlab chiqarish korxonalari qurildi.

Ishlab chiqarish boʻyicha vohamiz yetakchi oʻrinlarga ega boʻldi. Vohani suv bilan taʼminlash boʻyicha Prezidentimiz tashabbusi bilan boshlangan yana bir yirik loyiha asosida ishlar qizgʻin davom etyapti. Xususan, Toʻpalang suv omboridan 361 km masofaga suv tarmoqlari tortilyapti. Ushbu loyiha ishga tushsa viloyat ahlini toza ichimlik suvi bilan taʼminlash darajasi 90 foizga yetkaziladi. Sherobodda qurilayotgan fotoelektr stansiyasi ham xuddi shunday yirik olamshumul yangi loyiha boʻldi.

Ushbu loyihalar mamlakatda tobora ortib borayotgan elektr- energiyasiga boʻlgan ehtiyojni qondirish uchun 2030-yilga qadar 2,5 gegavattgacha ekologik toza quyosh energiyasini ishlab chiqarish strategiyasining muhim tarkibiy qismlaridan biri hisoblanadi. Bunday yashil loyihalarni amalga oshirish qanday iqtisodiy samara berishi, qayta tiklanadigan manbalarning mamlakat energetika tarmogʻiga qoʻshilishi va iqlimga salbiy taʼsirini kamaytirishini tasavvur qilish qiyin emas. Shuningdek, dasturga koʻra bu yerda suv taʼminoti, sanitariya, tuman isitish tizimlarini rivojlantirish kabi maqsadlar ham koʻzda tutilgan. Umid qilamizki, yaqin kelajakda xalqimiz turmush farovonligi yanada yaxshilanib, chekka qishloqlarimiz koʻchalari uzluksiz elektr nuridan yorugʻ va charogʻon boʻladi.

Prezidentimiz ishtirokidagi navbatdagi Xalq deputatlari Surxondaryo viloyat Kengashi yigʻilishida energetika masalalariga ham eʼtibor qaratildi. Sariosiyo tumanidagi gidroelektrstansiyasi hamda yangi uchta kichik va mikro GESda shu yilning oʻzida 350 million kilovatt soat elektr energiyasi ishlab chiqarilishi xususida fikr-mulohazalar bildirildi. Shuningdek, davlatimiz rahbari bugunning eng kechiktirib boʻlmas masalasi maktab taʼlimi va maktabgacha taʼlim masalasiga toʻxtaldi. Bu borada Surxondaryo respublikaga namuna boʻlishi kerakligi, bunda ota-onalar majburiyatini yanada oshirish lozimligi qayd etildi. Shuni taʼkidlash kerakki, soʻnggi yillarda mamlakatimizda taʼlim sohasidagi islohotlar zamonaviy tendensiyalarga mos holda rivojlanib bormoqda. Bu borada sifatli taʼlim mamlakatning muhim ustuvor yoʻnalishlaridan biriga aylanmoqda.

–Bogʻchaga borgan bolamiz bilan bormagan bolamizni ona biladi, ayol biladi,-deya taʼkidlab oʻtdi Prezidentimiz. Shu xususda “Bozor kunini farzandimizni qabul kuni”, -deb Surxondaryo tajribasi etib belgilashni taklif etdi Davlatimiz rahbari. Ish shundan boshlansa oila va maktab rishtalarining oʻzaro bogʻliqligi yanada mustahkamlanishi taʼkidlandi.

Shubhasiz, sifatli taʼlim yangi marralarni egallashga olib keladigan eng qisqa va oqilona yoʻldir. Bu borada vohamizdagi oʻzgarishlar, olib borilayotgan tizimli islohotlar ham kelajakda oʻz mevasini berishiga umid qilamiz.

Muxtasar aytish mumkinki, mazkur sohalardagi tub oʻzgarishlar oʻz natijasini oʻrta va uzoq istiqbolda koʻrsatadi.

Rustam Hamrayev,

Oʻzbekiston “Adolat” SDP

Surxondaryo viloyat Kengashi raisi.