Toʻqqiz oylik faoliyatga nazar tashlandi

“Adolat” SDP Buxoro viloyat Kengashi faollar zalida viloyat, shahar va tuman Kengashlari faoliyatining 2023 yil 9 oyi mobaynida amalga oshirilgan ishlar yuzasidan hisobot anjumani oʻtkazildi. Hisobot anjumanida “Adolat” SDP viloyat Kengashi xodimlari, shahar va tuman Kengashi raislari hamda deputatlar ishtirok etdilar. Yigʻilishda soʻzga chiqqan partiya viloyat Kengashi raisi M.Hamidov partiyamiz tomonidan amalga oshirilgan ishlarning rejasi, maqsadi va uning inson hayotida tutgan oʻrni borasida batafsil toʻxtalib oʻtdi. Shundan soʻng, partiya shahar va tuman Kengashi raislarining 9 oylik hisobotlari tinglandi, tahlil qilindi va muhokama etildi.

Hisobot davomida taʼkidlanganidek, xalq bilan yuzma-yuz muloqot oʻrnatish maqsadida partiyaning “Muammo bilan yuzma-yuz” loyihasi doirasida barcha darajadagi deputatlik korpuslari va partiya faollari har haftaning chorshanba kunlari muntazam ravishda mahallalarda xalq bilan yuzma-yuz muloqotlar oʻrnatib kelmoqdalar. Shuningdek, fuqarolarning huquqiy madaniyatini oshirish, mamlakatimizda qonunchilik bazasini har tomonlama mustahkamlash borasida partiyaning “Adolat” siyosiy-huquqiy oʻquvlar kuni” loyihasi doirasida har haftaning seshanba kunlari har bir tuman va shaharlardagi mahallalarda aholini keng jalb qilgan holda siyosiy-huquqiy oʻquvlar tashkil etib kelinmoqda.

Yigʻilishda partiya viloyat Kengashi raisi M.Hamidov deputatlik guruhi faoliyatlarini yanada jonlantirish, xalq orasida koʻproq boʻlish, ularni qiynayotgan muammolariga ijobiy yechim topishga alohida eʼtibor qaratish lozimligini taʼkidlab oʻtdi. Shu vaqt oraligʻida faoliyati yaxshi yoʻlga qoʻyilgan shahar va tuman Kengashlari eʼtirof etilib, faoliyati biroz sust boʻlgan tuman va shahar Kengashlariga ishni tizimli yoʻlga qoʻyish, faoliyatni yanada jonlantirish masalasi aytib oʻtildi. Jumladan, partiyaning Vobkent, Kogon shahar, Romitan hamda Kogon tuman Kengashlari faoliyati qolgan shahar va tuman Kengashlariga namuna tariqasida koʻrsatildi.

Mulohazalar qizgʻin savol-javoblar asosida olib borildi. Shuningdek, partiya faoliyatini yanada jonlantirish maqsadida partiya faollari va deputatlar tomonidan kelgusidagi rejalar hamda muhim vazifalar belgilanib olindi.

Mohigul Rahimqulova,

“Adolat” SDP Buxoro viloyat Kengashi matbuot kotibi.