Tozalik – yuksak madaniyat ifodasi

Oʻzbekiston “Adolat” sotsial-demokratik partiyasining “Tozalik yoʻlida birlashaylik” loyihasi doirasida atrof-muhitni ozoda saqlashda keng jamoatchilik, tashkilot va muassasalar, fuqarolarning oʻzini oʻzi boshqarish organlari hamda aholini jalb etgan holda ommaviy hasharlar uyushtirish borasida ibratli ishlar qilinmoqda. Shuningdek, belgilanmagan joylarga chiqindilar tashlanishining oldini olishga qaratilgan tushuntirish-targʻibot ishlari orqali jamoatchilik fikrini shakllantirish ham diqqat markazida boʻlmoqda.

Termiz shahar partiya kengashi faollari, partiya deputatlari ushbu loyiha asosida shahardagi “Tuproqqoʻrgʻon” mahallasida obodonlashtirish, tozaligini saqlash maqsadida oʻtkazilgan hasharga bosh-qosh boʻlishdi.

Nazokat Xidirova, Xalq deputatlari Termiz shahar Kengashi deputati:

-Ekologiya, atrof-muhit va inson salomatligiga oid vazifalar miqyosi yangicha yondashuvlar, jamoatchilik va davlat tuzilmalari oʻrtasidagi hamkorlikni yanada samarali darajaga koʻtarishni taqozo etmoqda. Zero, atrof-muhitni koʻz qorachigʻidek asrab-avaylash davlat, jamiyat va har bir insonning muhim burchidir.“Tozalik yoʻlida birlashaylik” loyihasidan koʻzlangan maqsad-vazifalar va gʻoyalar shahrimizda ham qoʻllab-quvvatlanmoqda. Xususan shahardagi “Tuproqqoʻrgʻon” mahallasida oʻtkazilgan koʻngillilar hashari ham ana shundan dalolat berdi.

Mahallalar aholisi, yoshlar partiya faollarining ezgu saʼy-harakatlariga xayrixohlik bildirib, tadbirda faol ishtirok etishdi. Hashar davomida mahallalarda keng koʻlamdagi tozalik va ozodalik yumushlari bajarildi. Koʻp qavatli uylar atrofi supurib-sidirilib, yanada koʻrkam holatga keltirildi.

Yoʻl atroflari tozalanib, daraxtlarga shakl berildi, xazonlardan tozalandi. Toʻplangan chiqindilar tadbirga jalb etilgan shahar obodonlashtirish boshqarmasining “Maxsustrans” boʻlimi transport vositalarida shahar tashqarisidagi alohida belgilangan maxsus joyga tashib chiqarildi.

- Tozalik va ozodalik azaldan xalqimizning milliy qadriyatlaridan biri sanaladi, — deydi mahalla faoli Salima Ahmedova. — “Adolat” partiyasi tomonidan “Tozalik yoʻlida birlashaylik” loyihasining hayotga tatbiq etila boshlanganligi koʻplab yurtdoshlarimizning koʻnglidagi ish boʻldi. Oʻylaymizki, loyiha doirasidagi amaliy tadbirlar mamlakatimizning barcha hududlarini, shaharu qishloqlarini qamrab, loyihadan oʻrin olgan hasharlar va boshqa ezgu tadbirlarda kattayu kichik birdek faol ishtirok etadi. Bularning barchasi koʻngillar obodligiga, aholi salomatligiga, yurtimiz yanada chiroy ochishiga xizmat qiladi.

Partiyamizning mazkur loyihasini amalga oshirish orqali fuqarolarning atrof-muhit, tabiat musaffoligiga masʼuliyatini yanada kuchaytirish, ularda ona tabiatni asrab-avaylash, yosh avlod tarbiyasida oʻz yurtini sevish, toza-ozoda saqlash, tabiatga ehtiyotkorona munosabatda boʻlish koʻnikmalarini mustahkamlash hamda tibbiy madaniyatini yanada yuksaltirish koʻzda tutilganligi bilan ahamiyatlidir.

Malika Amanova,

Xalq deputatlari Termiz shahar Kengashi deputati.