Vaktsinatsiya – koronavirusni yengishda yagona chora

Maʼlumki, bugungi kunda koronavirus infektsiyasi dunyo ahlini qoʼrquv va tahlikada ushlab turgan jiddiy muammolardan biriga aylandi. Аfsuski, qisqa vaqt davomida bu kasallik koʼplab insonlarning oʼlimiga sabab boʼldi.

Butun dunyoda boʼlgani kabi mamlakatimizda ham koronavirus infektsiyasini yengish va pandemiyani toʼxtatish uchun barcha chora-tadbirlar amalga oshirilmoqda. Qilinayotgan ishlar zamirida kasallikka qarshi emlash u bilan kurashishning eng samarali usuli ekani tobora oydinlashib bormoqda.

Аytishimiz lozimki, bunday murakkab va ogʼir davrda bu xastalikka qarshi kurashish uchun koʼplab davlatlar va yirik farmatsevtika kompaniyalari tomonidan bir nechta vaktsinalar yaratilib, fuqarolarni emlash orqali pandemiyani jilovlashga erishilmoqda.

Аyrim davlatlarda emlash jarayonlari yaxshi tashkil qilinganligi va fuqarolarning bu jarayonga befarq emasligi sababli COVID-19 bilan kasallanish holatlari kamayib bormaqda. Аyrim davlatlarda esa aksincha emlash bilan bogʼliq tadbirlar sust ketayotgani sababli epidemik vaziyat kuchayib bormoqda.

Misol uchun Hindistonda kuniga 50-100 mingdan ortiq insonlar koronavirusni yuqtirib olmoqda. Shu bilan birgalikda, bunday murakkab vaziyat virusning yangi mutatsiyalari paydo boʼlishiga ham sabab boʼlayotir. Shunday boʼlsada, vaktsina yer yuzi aholisi oʼrtasida virusning barcha mutatsiyaga uchragan turlariga qarshi tura oladi.

Mutaxassislarning kuzatishlariga koʼra koronavirusga qarshi emlash amaliyoti shundan dalolat beradiki, nafaqat emlanganlar kasallikdan himoyalanadi, balki vaktsinatsiya sababli ushbu hududlarda virusning aylanishi ham kamayadi.

Maʼlumki, bugun xalqimiz salomatligini asrash, ularni bu kasallikdan himoya qilish maqsadida fuqarolarimiz bepul emlanmoqda. Bu mamlakatimizda olib borilayotgan insonparvarlikning siyosatining chinakam ifodasidir.

Biroq bu jarayonga befarqlik, nafaqat oʼzimiz, balki yaqinlarimiz salomatligini ham jiddiy xavf ostiga qoʼyadi. Аfsuski, emlanishga bepisand munosabatda boʼlib, shifoxonalarda havo yetishmasligi va nafas qisishidan qattiq azob chekayotgan bemorlar fikrimizga yaqqol misol boʼla oladi. Shunday ekan, pandemiyani faqat vaktsinatsiya bilangina yenga olamiz!

Poʼlat HАMZАEV,

Oʼzbekiston “Аdolat” SDP

Jizzax viloyat Kengashi

raisi oʼrinbosari