Vatan himoyasi – muqaddas burch

Oʻzbekiston “Adolat” SDP Navoiy viloyat Kengashi tashabbusi bilan Navoiy shahridagi 7532-sonli harbiy qismda 14-yanvar — “Vatan himoyachilari kuni” munosabati bilan bayram tadbiri oʻtkazildi.

Unda Oʻzbekiston “Yozuvchilar uyushmasi” Navoiy viloyati boʻlimi raisi B.Sadriddinov, partiyaning Navoiy viloyat Kengashi raisi, xalq deputatlari Navoiy viloyat Kengashi deputati R.Hayitov hamda harbiy qismda xizmat qilayotgan serjant va ofitserlar va faxriylar ishtirok etishdi.

Tadbirda soʻz olganlar tomonidan bugungi tez oʻzgaruvchan, tahlikali zamonda mamlakatimiz sarhadlarini asrash, tinchligini taʼminlash har qachongidan ham muhim ekanligi taʼkidlandi.

Shuningdek, jarayonda Mustaqillik yillarida davlatimizning harbiy-siyosiy masalalar boʻyicha qatʼiy pozitsiyasini ifoda etadigan yangi Mudofaa doktrinasi ishlab chiqilganligi, amalga oshirilayotgan tub islohotlar natijasida milliy armiyamiz tezkor va ixcham, har qanday tahdidlarga munosib zarba berishga qodir boʻlgan jangovar kuchga aylanib borayotganligi qayd etildi.

Shu bilan birga Vatan himoyachilari va ularning oilalari uchun munosib hayot sharoitlarini yaratishga alohida eʼtibor qaratib kelinayotganligi alohida urgʻulandi. Harbiy xizmatchilar uchun imtiyozli kreditlar asosida muntazam ravishda koʻp qavatli uylar qurilayotganligi, ularning farzandlarini oliy taʼlim muassasalariga qabul qilishda imtiyozlar berilayotganligi aytib oʻtildi. 

Shubhasiz, bu kabi islohotlar mamlakatimiz mudofaa salohiyati va qudratini oshirishga xizmat qilishi tadbir ishtirokchilari tomonidan eʼtirof etildi.

Oʻzbekiston “Adolat” SDP Navoiy

viloyat Kengashi matbuot xizmati