“Vatan ravnaqi-yoshlar qoʻlida!”

“Adolat” SDP har yili 8-dekabr Oʻzbekiston Respublikasi Konstitutsiyasi qabul qilingan kun arafasida “Konstitutsiya bilimdoni” koʻrik tanlovini oʻtkazib keladi.
Bugun “Adolat” sotsial-demokratik partiyasining “Vatan ravnaqi-yoshlar qoʻlida” loyihasi doirasida “Konstitutsiya bilimdoni” koʻrik-tanlovining shahar bosqichi boʻlib oʻtdi. Yoshlarning huquqiy va siyosiy bilimlarini yanada yuksaltirishga, qolaversa, ularni Oʻzbekiston Respublikasi Konstitutsiyasi va amaldagi boshqa qonun hujjatlariga hurmat ruhida tarbiyalash, yoshlarda erkin fikrlash qobiliyati va nutq madaniyatini oʻstirish, ularning faol fuqarolik pozitsiyasini yanada mustahkamlash, ularda Vatanga muhabbat, kelajakka ishonch ruhini shakllantirish, iqtidorli yoshlarni aniqlash va ragʻbatlantirish hamda “Adolat” SDP dasturiy maqsad va vazifalarini targʻib qilish maqsadida ushbu tanlov Namangan viloyati yuridik texnikumida koʻtarinki ruhda oʻtkazildi.
Mazkur tanlov uch bosqichda tashkil etilgan boʻlib, unda Oʻzbekiston Respublikasi Konstitutsiyasi, “Siyosiy partiyalar toʻgʻrisidagi”gi, “Oʻzbekiston Respublikasi yoshlarga oid davlat siyosati toʻgʻrisida”gi qonunlar doirasida jami 11 nafar ishtirokchining bilimlari hakamlar hayʼati tomonidan baholab borildi.

Tanlov natijasiga koʻra, Namangan viloyati yuridik texnikumining 2-kurs talabasi Sh.Mamadaliyev birinchi oʻrinni qoʻlga kiritib, partiyaning diplom va esdalik sovgʻalari bilan taqdirlandi.

Mutlaq gʻolib boʻlgan ishtirokchi joriy yilning 22-noyabr sanasida boʻlib oʻtadigan viloyat bosqichiga yoʻllanmani qoʻlga kiritdi.
Tanlov soʻngida gʻolib va boshqa faol ishtirokchilarga partiyaning maxsus diplom hamda esdalik sovgʻalari topshirildi.

“Adolat” SDP
Namangan viloyat Kengashi matbuot xizmati.