Vatandan ketaman deganlarga – katta koʼcha

08.07.2021 03:07:03

Ijtimoiy tarmoqlarda norozi ohangdagi fikr bildiruvchi insonlar soni tobora oshmoqda. Bu bir tomondan jamoatchilik fikrining mustaqilligini taʼminlasa, ayrim jihatlarda ahloq va huquqiy normalarning qoʼpol ravishda buzilishiga olib kelyapti.

Kuzatishlarimning birida “Pasportimni otib Oʼzbekistoningizdan chiqib ketaman, Shavkat Miromonovich”, - deb ayyuxannoz solyapti bittasi. Bilib-bilmay, rasmiyatchilikdan holi, joylardagi muammolarga oʼzboshimchalik bilan burnini suqib yurganlarning oxirgi yoʼlagi - bir parcha chaqiruv qogʼoz ekaniga guvoh boʼlyapmiz.

Qoʼliga telefon koʼtargan ayrimlar bir zumda jonli namoyish qilib dagʼdagʼaga oʼtib oladi. Toʼgʼri, muammosiz tizim, korruptsiyaga botmagan tarmoq yoʼq. Iqtisod orqada qolgan. Lekin bu degani millat timsoli boʼlgan Prezidentni har kim istagancha, istagan shaklda obroʼsizlantira oladi degani emas-ku, axir. Men xalqimizni tamoman och yoki oʼta kambagʼal deya olmayman. Faqat bizning orzularimiz, istaklarimiz borgan sari kengayib, ruhimizni ochkoʼzlashtirib qoʼyayotganday. Shohona hayotning shinavandasiga aylanib qolyapmiz.

Qoʼshnilarimning oʼndan sakkizida avtoulov borligini soʼzimning isboti sifatida keltirishim mumkin. Xatto, “Lasetti”, “Cobalt” egasiga aylanish odatiy holga kirgan.

Toʼgʼri, xalqni qiynayotgan muammolar hali bisyor. Xalqning bir parchasi oʼlaroq, oʼsha muammolar girdobida men ham borman. Lekin duch kelgan odam har qanday mayda muammo uchun Prezidentni qoralab uni obroʼsizlantirish kompaniyasiga bosh suqishiga mutlaqo qarshiman. Chunki, men noshud, shukrsiz emasman. Vaqtida yoʼlimdagi katta korruptsion toʼsiqlarni aynan davlat rahbari chiqargan qarorlar taʼsirida yengib oʼtdim. Va bunday holatlar minglab vatandoshlarimga katta umid bilan qadam bosishiga zamin yaratdi.

Shuni unutmasligimiz lozimki, Oʼzbekiston davlati faqat Prezidentnikimas! U barchamizniki - sizniki, bizniki, ularniki... Shu inson nima qilsa ham mamlakat kori uchun harakat qilyapti. Bajarilgan islohotlarni koʼrmaslik uchun inson ojiz boʼlishi kerak, menimcha.

Xullas, “Yosh ketaman, qari oʼlaman”, deb qoʼrqitarkan. Nima xam derdik... Yurtdan ketmoqchi boʼlganlar bilan magʼrurlarcha xayrlashamiz. Shu tuproqni koʼziga surtayotganlarga esa el-yurt duosi ijobat boʼlsin, deymiz.

 

Muhabbat NАZАR,

partiya faoli

Ulashing!

Fikringizni qoldiring

Iltimos javobingizni kiriting

+