Viloyat Kengashining navbatdan tashqari X Konferensiyasi boʻlib oʻtdi

Joriy yil 12-may kuni boʻlib oʻtgan Plenumda Oʻzbekiston “Adolat” SDP tomonidan Oʻzbekiston Prezidentligiga nomzod koʻrsatish masalasini partiyaning navbatdagi XI Qurultoyi muhokamasiga kiritish boʻyicha qaror qabul qilingan edi.

Bugungi kunda partiyaning viloyat, shahar va tuman Kengashlari tomonidan joylarda hududiy partiya Konferensiyalari oʻtkazilayotgan boʻlib, ularda XI Qurultoyda qatnashadigan delegatlar saylanmoqda. Shuningdek, hududiy Konferensiyalarda muhim siyosiy jarayonda munosib qatnashish uchun hududiy tashkilotlar oldida turgan dolzarb vazifalar atroflicha koʻrib chiqilmoqda.

Xuddi shunday tadbirlardan biri Surxondaryo viloyat Kasaba uyushmalari Kengashi faollar zalida partiyaning viloyat Kengashining onlayn X Konferensiyasi oʻtkazildi. Mazkur Konferensiyada surxondaryolik “Adolat”chilar partiyaning navbatdagi Qurultoyida ishtirok etadigan delegatlarni saylab olishdi.

Soʻzga chiqqanlar partiya bugun yurtimizda olib borilayotgan bu kabi xalqchil va hayotiy islohotlarning muvaffaqiyatli borishi uchun masʼuliyatni oʻz zimmasiga olgan siyosiy kuch ekanligi qayd etildi. Partiyaning butun maqsad istagi olijanob va tanti xalqimizga sidqidildan xizmat qilish, olib borilayotgan islohotlarni yangi bosqichda davom ettirish, yurtimizni dunyoning yetakchi davlatlari safidan oʻrin olishi uchun harakat qilish, mana shu yoʻlda fidoiylik bilan faoliyat koʻrsatib-maqsadimiz xalqimizni rozi qilishdan iborat ekanligi eʼtirof etildi.

Qayd etilganidek, bugungi kunda “Adolat” SDP Surxondaryo viloyati Kengashi tarkibida 50 mingdan ortiq maslakdoshlarni oʻz saflariga biriktirgan 470 ta boshlangʻich partiya tashkiloti faoliyat olib bormoqda. Ushbu BPTlarda partiyaviy loyihalarni munosib darajada ijro etayotgan, aholi muammolarini aniqlash va ularga maqbul yechim topishda faollik koʻrsatayotgan hamda partiya gʻoya va mafkuralarini joylarda targʻib qilayotgan aʼzolar koʻpchilikni tashkil qiladi. Shu bois hududiy konferensiyalarda partiyaning navbatdagi Qurultoyiga delegat saylash masalasida bir toʻxtamga kelish oson kechmadi.

Qizgʻin muhokamalardan soʻng Oʻzbekiston “Adolat” SDP ning maqsad va vazifalarini keng targʻib qilishda, partiya tashkilotlari oʻtkazadigan tadbirlarda ishtirok etib, oʻz fikr-mulohazalarini erkin bildirishda faol boʻlgan partiya aʼzolari va faollaridan 8 nafari delegat etib saylandi. Shu asnoda delegatlar partiyaning navbatdagi oʻtkaziladigan XI Qurultoyida ishtirok etish huquqini qoʻlga kiritdi.

Shuningdek, konferensiyada koʻrib chiqilgan boshqa masalalar yuzasidan tegishli qarorlar qabul qilindi.

Gulshod Tursoatova,

Oʻzbekiston “Adolat” SDP

Surxondaryo viloyat Kengashi matbuot kotibi.