Xalq bilan hamnafas

Xalqning turmush tarzini bozordagi serobchilik va bunyodkorlik ishlaridagi zamonaviylikka qarab bilsa boʻladi. Chust dehqonchilik, hunarmandchilik, tadbirkorlik va albatta, ijodkorlik borasida dong taratgan tumanlardan biridir.

Karkidon qishlogʻiga keta turib, yoʻl boʻyida qad rostlagan, koʻp qavatli binoga koʻzim tushib, xayolimga: “Koʻrimli ekan, bu qanday bino boʻldi?” degan savol keldi. — Bu koʻrkam binoni tadbirkor Murodjon aka Ashurov qurgan,-dedi tuman partiya Kengashi raisi Behzod Siddiqov,- fikrimni ilgʻab olganday.-shahardagi “Bibi ona” mahalla yigʻini hududida joylashgan, dukkakli mahsulotlarni qayta ishlaydigan “SEVEN HILLIS AGRO COMODITIES” korxonasi. Bu yerda oltmish nafar yoshlar ish bilan taʼminlangan. Mahsulotlar Xitoy va Janubiy Koreyaga eksport qilinadi.

Kengash raisi bilan qishlogʻining yaqinda asfalt yotqizilgan koʻchasidan kirib borayotib, “Karkidon” saylov okrugidan tuman kengashi deputati Muqaddas Yakubovani uchratdik. Muqaddasxon atrofdagi “Koʻktosh”, “Qoʻshtepa” mahalla fuqarolar yigʻinlaridagi bir yarim kilometr yoʻl tekislanib, asfalt yotqizilgani, ichimlik suv quvurlari yotqizilib, aholi muammolari hal etilayotganini gapirib berdi. Ayni payda 38-maktabgacha taʼlim maskanini taʼmirlash uchun hozirlik koʻrilayotganini ham eslatib oʻtdi.

-Tuman Kengashi deputatlarining saʼy-harakati bilan “Shoyon”, “Sherbilak” mahalla yigʻinlaridagi koʻchalarga shagʻal toʻshaldi, Varzik katta qatnov yoʻli asfaltlandi,-deya qoʻshimcha qildi tuman Kengashi raisi Behzod Siddiqov,- “Sherbilak” mahallasi hududida “Baymoq” saylov okrugidan deputat Roʻzigul Anorqulova tomonidan subsidiya asosida yer osti qudugʻi kavlatilib, ichimlik suvi chiqarildi. Deputatlarimiz ayollar huquqlarini himoya qilish, kambagʻallikni qisqartirish, partiya safini kengaytirish hamda aholi murojaatlari bilan ishlashda faollik koʻrsatib, muammo va kamchiliklarni bartaraf etishda yaqindan yordam bermoqdalar.

Shu kuni 57-umumiy taʼlim maktabi oʻqituvchilar jamoasi va 9-, 10-sinf oʻquvchilari ishtirokida “Deputat — yoshlar davrasida” mavzusida uchrashuv oʻtkazildi. 750 nafardan ziyod oʻquvchilar taʼlim olayotgan mazkur maktabda 67 nafar oʻqituvchilar boʻlib, ulardan toʻrt nafari imtiyozli sertifikat sohib ekan. Bu yil maktabni aʼlo baholarga bitirgan oʻn olti nafar oʻquvchi oliy oʻquv yurtlariga oʻqishga kiribdi.

-Lekin, taʼlim-tarbiya sohasida qiladigan ishlarimiz hali koʻp,-dedi partiya aʼzosi, maʼnaviy-maʼrifiy ishlar boʻyicha direktor oʻrinbosari Mahfuza Yoʻldosheva,-bunda ota-onalarning oʻrni bilinyapti. Ular na kitob, na gazeta oʻqishmaydi. Buning ustiga ota-onalar yigʻilishiga ham kelishmaydi. Bu holat yoshlar tarbiyasiga ham salbiy taʼsir koʻrsatmoqda. Shuning uchun uyma-uy yurib, ota-onalar bilan yuzma-yuz gaplashishga toʻgʻri kelmoqda.

Tumanda hafta davomida deputatlar ishtirokida “Vatan kelajagi — yoshlar qulida”, ”Adolatli qaynona”, ”Yangi Oʻzbekiston yoshlari — buyuk kelajak sari”, ”Tozalik yoʻlida birlashaylik”, ”Oʻzbekiston -inson qadri ulugʻlangan yurt” kabi qator mavzularda tadbirlar oʻtkazib borilmoqda ekan. Shuningdek, partiya faollari 2024-yil uchun “Adolat” ijtimoiy-siyosiy gazetasiga obuna boʻlish masalasiga ham jiddiy kirishganliklarini ularning harakatlaridan ilgʻab oldik.

Muhiddin Imomadiyev,

 “Adolat”SDP Namangan viloyat  Kengashi matbuot kotibi.