Xorazmda nomzodimizni qoʻllab-quvvatlovchi imzolar soni ortib bormoqda

Maʼlumki, hozirgi kunda saylovga start hamda partiyamizning saylovda ishtirok etishiga ruxsat berilgani munosabati bilan partiyaning Xorazm viloyat Kengashi tomonidan amalga oshirilayotgan ishlar yanada jonlandi.

Partiyaning shahar va tuman hamda viloyat Kengashlarining navbatdagi konferensiyalariga puxta tayyorgarlik, partiyamizning nufuzini keng omma orasida oshirish maqsadidagi xalq bilan muloqotlar, fuqarolarning ayniqsa, yoshlar va ayollarning siyosiy va huquqiy bilimini oshirishga qaratilgan hamda kuzatuvchi va vakolatli vakillarning yillar boʻyi siyosiy bilim va saylov kunida zimmasiga yuklatiladigan ustuvor vazifalarga qaratilgan onlayn va oflayn siyosiy oʻquvlarning muntazam tashkil etilayotgani, albatta, har bir partiya xodimidan ulkan masʼuliyat talab etishi bilan bir qatorda, fuqarolarimizning siyosiy, huquqiy va ijtimoiy bilimlarini mustahkamlashga xizmat qilmoqda.

Ayni damda, partiyaning Xorazm viloyat Kengashi tomonidan Oʻzbekiston Respublikasi Prezidentligiga koʻrsatilgan Robaxon Mahmudovaning nomzodini qoʻllab-quvvatlovchi imzolarni toʻplash qizgʻin pallaga kirgan.

Xususan, Respublika ixtisoslashtirilgan onkologiya va radiologiya ilmiy-amaliy tibbiyot markazi Xorazm filialining ochiq maydonida tashkil etilgan nomzodni qoʻllab-quvvatlovchi imzolar toʻplashga qaratilgan targʻibot tadbiri partiya faollari, mazkur muassasaning ishchi-xodimlari, BPT aʼzolari, yoʻlovchilar va tibbiyot markaziga tashrif buyurgan va unda davolanayotgan fuqarolar va ularni soʻrab keluvchilar faol ishtirok etishdi.

Tadbir avvalida, siyosiy jarayonlarda partiya tomonidan olib borilayotgan ishlar, Saylov kodeksining mazmun va mohiyati, saylovda faol ishtirok etish hamda nomzodni qoʻllab-quvvatlashga doir imzo varaqasini toʻldirish talablari va maqsadi toʻgʻrisida partiya faollari tomonidan atroflicha maʼlumotlar berib oʻtildi.

 Muhabbat Solayeva, tadbir ishtirokchisi:

“Adolat” partiyasining ramzi aks etgan, jozibador shakllangan soyabonni koʻrib koʻzlarim quvonib ketdi va gavjum odamlar tomoni yoʻl oldim. Prezident saylovi munosabati bilan imzo toʻplash jarayoniga men ham partiyadan koʻrsatilgan nomzodni yoqlab hech ikkilanmasdan imzo qoʻydim. Chunki, partiyaga boʻlgan mehrim boʻlakcha, partiya ramzlarini yaxshi koʻrishim bilan bir qatorda faollari tomonidan olib borilayotgan samarali ishlarga havasim keladi. Partiyaga aʼzo boʻlish koʻp yillik istagimni ham shu joyning oʻzida partiya faollariga mamnuniyat bilan bildirdim.

Otaxon Tadjiddinov, RIO va RIATM Xorazm filialidagi BPT raisi, tadbir ishtirokchisi:

Nomzodimiz fuqarolar hamda koʻp sonli BPTmiz aʼzolari tomonidan bir ovozdan qoʻllab-quvvatlandi. Haqiqatdan ham R.Mahmudova Oʻzbekiston Respublikasi Prezidentligiga munosib nomzod ekaniga tadbir ishtirokchilarining faolligida namoyon boʻldi. Saylovda partiyamizning gʻalabasi uchun BPTmiz aʼzolari bilan hamjihatlikda kurashamiz.

Bir soʻz bilan aytganda, partiyamizning saylovchilari oldidagi burch va masʼuliyatini ado etishi orqali xalqimiz ishonchiga sazovor boʻlayotgani bu kabi boʻlib oʻtayotgan siyosiy jarayonlarda oʻz ifodasini topmoqda. Bu esa oʻz navbatida mamlakatimiz taqdiri uchun boʻlib oʻtadigan saylovda gʻoliblikni qoʻlga kiritishimizda zamin yaratishi shubhasizdir.

Zamira Abdullaeva,

Oʻzbekiston “Adolat” SDP

Xorazm viloyat Kengashi matbuot kotibi.