Xorazmdan Qurultoyga delegatlar saylandi

Respublika ixtisoslashtirilgan onkologiya va radiologiya ilmiy-amaliy tibbiyot markazi Xorazm filialida Oʻzbekiston “Adolat” sotsial-demokratik partiyasi Xorazm viloyat Kengashining VI-konferensiyasi boʻlib oʻtdi.

Konferensiyaga shahar va tuman Kengashi konferensiyalaridan saylangan delegatlar bilan bir qatorda partiya faollari, deputatlari, boshlangʻich partiya tashkilotlari raislari, ayollar qanotlari va yosh adolatchilar yetakchilari hamda ommaviy axborot vositalari ishtirok etishdi.

Konferensiya kun tartibida “Adolat” SDPning XI Qurultoyiga delegatlarni saylash” toʻgʻrisidagi masala muhokama etildi.

Taʼkidlanishicha, hozirgi kunda partiya Xorazm viloyat Kengashida jami 48 ming 594 nafar aʼzo 314 ta boshlangʻich partiya tashkilotiga birlashgan. Oliy Majlis Qonunchilik palatasida 1 nafar, mahalliy Kengashlarda 50 nafar deputat faoliyat olib bormoqda.

Shuningdek, partiyaning 30 ga yaqin loyihalari doirasida amalga oshirilgan ishlar natijasida partiyaning xalq orasidagi taniluvchanligi oshib bormoqda. Jumladan, haftaning har chorshanba kuni amalga oshiriladigan “Muammo bilan yuzma-yuz”, har seshanba kuni “Siyosiy-huquqiy bilimlarni mustahkamlash- demokratik jamiyat poydevori” , shuningdek, “Bir oyda bir ish oʻrni”, “Vatan kelajagi yoshlar qoʻlida”, “Saxovat — benazir qadriyat” kabi qator loyihalar partiyamiz faollarining saʼy-harakatlari bilan hayotga tatbiq etilib, yurtdoshlarimizning oʻz hayotidan rozi boʻlib yashashida xizmat qilmoqda.

2023-yilning 8-may kuni Oʻzbekiston Respublikasi Konstitutsiyasining 128-moddasi hamda Oʻzbekiston Respublikasi Saylov kodeksining 66-moddasiga muvofiq 2023-yil 9-iyul kuniga “Muddatidan ilgari Oʻzbekiston Respublikasi Prezidenti saylovini tayinlash toʻgʻrisida”gi Oʻzbekiston Respublikasi Prezidentining PF-68-sonli Farmoyishi qabul qilindi. Markaziy saylov komissiyasining joriy yil 10-may kunidagi qarori bilan mamlakatimizda Oʻzbekiston Respublikasi Prezidenti saylovi kompaniyasi boshlanganligi eʼlon qilindi.

Mazkur saylovda faol ishtirok etish va partiya tomonidan koʻrsatiladigan nomzodni aniqlash maqsadida joriy yilning 12-may kuni partiya Siyosiy Kengashining XI Plenumi boʻlib oʻtdi va Mahmudova Robaxon Anvarovnani Oʻzbekiston Respublikasi Prezidentligiga boʻlajak nomzod sifatida koʻrsatish masalasini partiya XI Qurultoyi muhokamasiga kiritish maqsadida partiya XI Qurultoyini 2023-yilning 29-may kuni Toshkent shahrida chaqirish yuzasidan qaror qabul qilindi.

Shu munosabat bilan Oʻzbekiston “Adolat” sotsial-demokratik partiyasi XI Qurultoyiga partiya viloyat Kengashidan viloyat manfaatlarini ifodalash va himoya qilish maqsadida ishtirok etadigan delegatlar tarkibini aniqlash yuzasidan “Adolat” SDP Xorazm viloyat Kengashi oʻzining VI Konferensiyasini chaqirdi va ushbu masala kun tartibi muhokamasiga qoʻyildi.  

Konferensiyada 8 nafardan iborat boʻlgan delegatlar partiyaning XI-Qurultoyiga saylandi.

  Mehrinoz Abdiyazova, Shovot tuman Kengashi raisi, delegat:

– Joriy yil mamlakatimizning ijtimoiy-iqtisodiy, siyosiy jarayonlarini jadallashtirishga qaratilgan tarixiy voqealik bilan ahamiyatli boʻlmoqda. 30-aprel kuni boʻlib oʻtgan referendumdan soʻng fuqarolarimizning siyosiy va huquqiy faolligi sezilarli darajada ancha oʻsdi. Partiyamizning keng omma orasidagi obroʻ-eʼtibori yuksaldi. Bunda har bir partiyamiz faolining xizmatlari munosib boʻldi. Bugun boʻlib oʻtgan konferensiyada ham faol delegatlar orasidan Qurultoyga delegatlarni saralash juda qiyin kechdi. Chunki, bir-biridan faol, fidoyi faollarimizning soni tobora ortib bormoqda. Men ham bu masʼuliyat va ishonchni chuqur his qilgan holda, partiyamning rivoji orqali, mamlakatimizning taraqqiyotiga munosib hissa qoʻshishni izchillik bilan davom etishga bel bogʻladim.

Delegatlar   Oʻzbekiston Respublikasi Prezidenti saylovida partiyamizning munosib oʻrinlarni egallash hamda partiyaning XI-Qurultoyida faol ishtirok etish kabi dolzarb masalalarni oʻz oldiga ustuvor vazifa sifatida belgilab olishdi.

Konferensiya kun tartibida koʻrilgan masala yuzasidan tegishli qarorlar qabul qilindi va amaliyotga yoʻnaltirildi.

Zamira Abdullaeva,

Oʻzbekiston “Adolat” SDP

  Xorazm viloyat Kengashi matbuot kotibi.