Xotin-qizlar faolligi – jamiyat farovonligi

Bugungi kunda mamlakatimizda xotin-qizlarga katta eʼtibor qaratilmoqda. Jamiyatimizning turli sohalarida ularning faol ishtirok etishlari uchun barcha sharoitlar yaratilmoqda. Diyorimizda ayolga boʻlgan munosabat oʻz tarixiy ildizlariga ega, ajdodlarimiz doimo ayollarni qadrlashga, ularga nisbatan hurmat va izzatda boʻlishga daʼvat etishgan.

Muhtaram Prezidentimiz Shavkat Miromonovich Mirziyoyev rahnamoligida xotin-qizlarning ijtimoiy-siyosiy faolligini oshirish, salomatligini muhofaza qilish, intilish va tashabbuslarini qoʻllab-quvvatlash, ularga munosib mehnat va yashash sharoitlarini yaratishga alohida eʼtibor qaratilmoqda.

Berilayotgan bunday eʼtibor samarasi oʻlaroq xotin-qizlar hayotning turli soha va tarmoqlarida – bu davlat va jamiyat qurilishi, sanoat yoki qishloq xoʻjaligi boʻladimi, taʼlim-tarbiya yoki sogʻliqni saqlash, ilm-fan, madaniyat va sport boʻladimi – bularning barchasida fidokorona mehnat qilib kelishmoqda.

Mana shunday jonkuyar ayollardan biri Xalq deputatlari Jizzax shahar Kengashi deputati Oftoboy Nishonovadir.

Oftoboy Nishonova 1961-yil 6-iyunda Jizzax shahrida tavallud topgan. U koʻp yillar davomida Jizzax shahar “Olmazor” mahallasida xotin-qizlar bilan ishlash oilalarda maʼnaviy-axloqiy qadriyatlarni mustahkamlash boʻyicha mutaxassisi vazifasida faoliyat olib borgan. Shu yillar davomida O.Nishonova tomonidan xotin-qizlarning huquqlari va qonuniy manfaatlarini himoya qilish, ularning muammolarini oʻz vaqtida aniqlash, xotin-qizlarning bandligini taʼminlash, mehnat sharoitlarini yaxshilash, ularni oilaviy va xususiy tadbirkorlikka, hunarmandchilikka keng jalb etish, oilalarning reproduktiv salomatligini yaxshilash va tibbiy madaniyatini oshirish, oilaviy qadriyatlarni mustahkamlash, erta nikoh va ajrashishlarning oldini olish boʻyicha samarali ishlar olib borildi.

Xususan, Oftoboy Nishonova mehnat faoliyati davomida 100 ga yaqin xotin-qizlarga tadbirkorlik faoliyatini boshlash va rivojlantirish boʻyicha imtiyozli kreditlar olishda, yigirmaga yaqin yosh oilalarga subsidiya asosida uy-joylar olishlarida, 120 dan ortiq yordamga muhtoj boʻlgan va ogʻir ijtimoiy ahvolga tushib qolgan xotin-qizlarga ijtimoiy-huquqiy, psixologik va moddiy yordam koʻrsatishda, koʻplab yosh oilalarning ajralishini oldini olishda oʻzining munosib hissasini qoʻshib kelmoqda.

Qolaversa, O.Nishonova 2014-yildan buyon Xalq deputatlari Jizzax shahar Kengashi deputati sifatida xalq manfaatlarini himoya qilishda, ularning muammolarini oʻz vaqtida hal etishda, qolaversa, viloyatimizni ijtimoiy-iqtisodiy rivojlantirishda jonbozlik koʻrsatib kelmoqda.

Uning olib borgan samarali mehnatlari inobatga olinib, 2016-yilda “Mustaqillikning 25 yilligi” esdalik nishoni, 2020-yilda “Moʻtabar ayol”, “Mehr-saxovat” koʻkrak nishonlari bilan taqdirlangan. Qolaversa, “Adolat” SDP Jizzax viloyat Kengashining “Xalqparvar deputat” nominatsiyasi boʻyicha faxriy yorligʻi, Jizzax viloyati va Jizzax shahar hokimligining koʻplab faxriy yorliq va tashakkurnomalar bilan taqdirlangan.

“Adolat” SDP Jizzax viloyat Kengashi

Matbuot xizmati.