Xotin-qizlar huquq va manfaatlarini taʼminlash yoʻlida

Oʻzbekiston “Adolat” SDP Uzun tuman Kengashi, tuman “Ayollar qanoti” Kengashi hamda tumandagi “Tojikobod” MFY faollari bilan hamkorlikda hududdagi 20-sonli DMTTda “Xotin-qizlarni tazyiq va zoʻravonlikdan himoya qilish muhim vazifa” mavzusida tadbir tashkil etildi. Tadbirda partiyaning tuman Kengashi va Ayollar qanoti Kengashi vakillari, deputatlar, mahalla xotin-qizlar faollari, din vakillari, BPT aʼzolari va mahalla fuqarolari ishtirok etishdi.

Tadbirda soʻzga chiqqanlar “Xotin-qizlarni tazyiq va zoʻravonlikdan himoya qilish toʻgʻrisida”gi Oʻzbekiston Respublikasi Qonuni hamda Prezidentimizning 2019 yil 7 martdagi “Xotin-qizlarning mehnat huquqlari kafolatlarini yanada kuchaytirish va tadbirkorlik faoliyatini qoʻllab-quvvatlashga oid chora-tadbirlar toʻgʻrisida”gi qarori va ushbu yoʻnalishda olib borilayotgan ishlar yuzasidan tushunchalar berishdi.

Maʼruzachilar tomonidan mamlakatimizda xotin-qizlarni tazyiq va zoʻravonlikdan himoya qilish, shuningdek gender tenglikni taʼminlash, ayollarning ijtimoiy va siyosiy hayotdagi rolini oshirish ishlari bir necha yoʻnalishlarda, xususan, ayollar huquqlari toʻgʻrisidagi qonun hujjatlarini, ayollarni himoya qilishning institutsional asoslarini takomillashtirilayotganligi alohida qayd etildi. Aholining gender tenglik va ayollar huquqlari toʻgʻrisida xabardorligini oshirish, huquqni qoʻllash amaliyotida ularga rioya etilishini taʼminlash uchun masʼul mansabdor shaxslarni tegishli huquqiy meʼyorlar asosida oʻqitish boʻyicha olib borilayotganligi alohida taʼkidlandi.

Zulayho Xoʻjamqulova, Xalq deputatlari Uzun tuman Kengashi deputati, “Ayollar qanoti” Kengashi faoli:

- Yurtimiz aholisining 50 foizini tashkil etadigan xotin-qizlar jamiyatning barcha sohalarida samarali faoliyat yuritmoqda. Gender tenglikni joriy qilish nuqtai nazaridan barcha sohalar qatorida taʼlimdagi ijobiy siljishlarni alohida taʼkidlash kerak. Oʻtkazilgan tadbir jamiyatimizda xotin-qizlarni tazyiq va zoʻravonlikdan himoya qilishda, xotin-qizlar va erkaklarning teng huquqi hamda imkoniyatlar kafolatlarini taʼminlashda, ularning yechimlarini ilmiy va amaliy yoʻnalishlarda ochib koʻrsatishda muhim ahamiyat kasb etadi. Aytish joizki, Qonunning qabul qilinishi davlat boshqaruvida ayollarning erkaklar bilan teng sharoitda ishtirok etishini, ayniqsa, rahbarlik lavozimlarida ham erkin faoliyat olib borishini taʼminlaydi.

Tadbir soʻngida ishtirokchilar tomonidan tavsiya va takliflar bildirilib, oʻzlarini qiziqtirgan barcha savollarga javoblar olishdi.

Umidaxon Mamajonova,
“Adolat” SDP Uzun tuman 
“Ayollar qanoti” Kengashi faoli