Xotin-qizlar manfaatlari-davlat himoyasida

“Adolat” SDP Qiziriq tuman “Ayollar qanoti” Kengashi va tumandagi “Yetimqum” mahalla faollari tomonidan mazkur mahallada joylashgan Pedagogika kollejida “Xotin-qizlar oʻrtasida noqonuniy mehnat migratsiyasini oldini olish-jamiyat taraqqiyotining kafolati” mavzusida tadbir tashkil etildi. Tadbirda partiya tuman Kengashi va tuman “Ayollar qanoti” Kengashi faollari, deputatlar, mahalla faollari, BPT aʼzolari va talaba yoshlar ishtirok etishdi.

Tadbirda soʻz olganlar soʻnggi yillarda xotin-qizlarni ijtimoiy qoʻllab-quvvatlash boʻyicha tizimli ishlar olib borilayotganligi, xotin-qizlar muammolarini hal etishga qaratilgan noyob tizim — “Ayollar daftari” boʻyicha keng koʻlamli ishlar roʻyobga chiqarilayotganligi, xotin-qizlar va bolalar mehnatini muhofazalash, majburiy mehnatning oldini olish masalasi yangi tahrirdagi Konstitutsiyada ham mustahkamlanganligi aytib oʻtildi. Yaʼni unda majburiy mehnat, bolalarning barkamol rivojlanishiga salbiy taʼsir qiladigan har qanday bolalar mehnati taʼqiqlanishi belgilab qoʻyilganligi, ushbu muhim oʻzgarish aynan majburiy mehnat, xususan, bolalar majburiy mehnatiga toʻliq barham berilishida muhim huquqiy asos boʻlganligi taʼkidlandi.

Xurshid Jabborov, IIB Qiziriq tuman boʻlimi xodimi, tadbir ishtirokchisi:

- Nafaqat yurtimizda, balki butun dunyoda haqiqiy ijtimoiy himoyaga muhtoj qatlam — bolalar, ayollar, qariyalar va nogironligi boʻlgan shaxslardir. Yangi tahrirdagi Konstitutsiyamizda ham ijtimoiy himoyaga muhtoj qatlam eʼtibordan chetda qolmadi. Har bir qatlamning ijtimoiy muhofazasi atroflicha qamrab olindi. Shu bois Konstitutsiyamiz inson manfaati va qadri ulugʻlangan ochiq demokratik davlat, erkin fuqarolik jamiyati barpo etish yoʻlida huquqiy poydevor boʻladi. Yangi tahrirdagi Konstitutsiyamizga homiladorligi yoki bolasi borligi sababli ayollarni ishga qabul qilishni rad etish, ishdan boʻshatish va ularning ish haqini kamaytirish taqiqlanishi toʻgʻrisidagi yangi norma kiritilib, bunday diskriminatsiyaga chek qoʻyishning huquqiy asosi yaratildi. Shu bilan birga, Bosh qomusimizda xotin-qizlar va erkaklar teng huquqliligi, davlat xotin-qizlar va erkaklarga jamiyat hamda davlat ishlarini boshqarishda, jamiyat va davlat hayotining boshqa sohalarida teng huquq va imkoniyatlarni taʼminlashi belgilandi.

Tadbir davomida ishtirokchilar oʻzlarini qiziqtirgan savollariga maʼruzachilardan tegishlicha javoblar olishdi.

Shohista Aliyeva,

 “Adolat” SDP Qiziriq tuman “Ayollar qanoti” Kengashi faoli.