Xotin-qizlar va bolalar huquqlari taʼminlanyaptimi?

Pastdargʻom tumanidagi Navroʻz MFYda Qonunchilik palatasi tomonidan 2023-yil 23-martda qabul qilingan, Senat tomonidan 2023-yil 6-aprelda maʼqullangan “Xotin-qizlar va bolalar huquqlari, erkinliklari hamda qonuniy manfaatlarini ishonchli himoya qilish tizimi yanada takomillashtirilishi munosabati bilan Oʻzbekiston respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi qonun mazmun-mohiyatini tushuntirishga bagʻishlangan tadbir boʻlib oʻtdi. Unda xalq deputatlari tuman Kengashi kotibiyati mudiri Fotima Bozorova, “Adolat” partiyasi Pastdargʻom tumani kengashi raisi Xonbuvi Hayitova, viloyat Kengash deputati Inobat Bobokulovalar soʻzga chiqib taʼkidlaganidek, mamlakatimizda xotin-qizlar va bolalar huquqlari, erkinliklari hamda qonuniy manfaatlarini tazyiq va zoʻravonlikdan ishonchli himoya qilishning institutsional hamda huquqiy asoslarini tubdan takomillashtirishga, bolalar orasida nazoratsizlikning va ular tomonidan huquqbuzarliklar sodir etilishining oldini olishga, shuningdek nogironligi boʻlgan bolalarni hamda ota-ona qaramogʻidan mahrum boʻlgan bolalarni davlat tomonidan qoʻllab-quvvatlashga qaratilgan keng koʻlamli ishlar amalga oshirilmoqda.

Shu bilan birga bugungi kunda huquqni qoʻllash amaliyotida xotin-qizlarning huquqlari, erkinliklari hamda qonuniy manfaatlarini ishonchli himoya qilish bilan bogʻliq masalalarda bir qator muammolar mavjud.

Xususan, xotin-qizlar va bolalarning huquqlariga daxl qiluvchi jinoiy qilmishlar uchun mutanosib sanksiyalar belgilanmagan, xotin-qizlarni shilqimlik va zoʻravonlikdan himoya qilishning huquqiy kafolatlari mavjud emas, tazyiq va zoʻravonlikdan jabrlangan shaxsga davlat himoyasini taqdim etuvchi orderning amal qilish muddati (oʻttiz kun) xotin-qizlarning huquqlari hamda qonuniy manfaatlari yetarli darajada himoya qilinishini taʼminlash imkonini bermaydi, alimentlarni toʻlamaganlik uchun jazo sifatida jarima solinishi yanada koʻproq moliyaviy qiyinchiliklarni keltirib chiqarmoqda. Oʻylaymizki yuqorida zikr etilgan qonun yechimga sabab boʻladi.

Inobat Bobokulova,

Xalq deputatlari Samarqand viloyat Kengash deputati,

Samarqand shahar 1-FHDYO bo’limi mudirasi.