Xotin-qizlarning huquqiy manfaatlarini taʼminlash – davr talabi

Mamlakatimizda xotin-qizlarning oʻz imkoniyatlarini toʻlaqonli roʻyobga chiqarish, ularning haq-huquqlarini himoya qilish, ular uchun zarur shart-sharoitlarni taʼminlash davlat siyosatining ustuvor yoʻnalishlaridan biriga aylandi.

“Adolat” SDP tomonidan xotin-qizlarning jamiyatdagi siyosiy faolligini yanada oshirish va ijtimoiy himoyasini kuchaytirish boʻyicha keng miqyosdagi ishlarni amalga oshirish, ularning tashabbuslarini qoʻllab-quvvatlash masalalariga alohida eʼtibor qaratib kelinmoqda.

Xotin-qizlarning huquqlarini himoya qilish, ularning siyosiy faolligini yanada oshirish maqsadida partiyaning Jizzax viloyat Kengashi tomonidan partiyaning “Bir adolatchi yuz ayolga himoyachi” loyihasi doirasida Jizzax shahridagi 2-sonli umumtaʼlim maktabida “Xotin-qizlarni zoʻravonlik va tazyiqlardan himoya qilishning huquqiy asoslari” mavzusida davra suhbati tashkil etildi.

Tadbirda partiyaning viloyat Kengashi xodimlari, mahalliy Kengash deputatlari, partiya faollari, partiyaning “Ayollar qanoti” Kengashlari aʼzolari, Jizzax shahar “Oqila ayollar” harakati faollari, Jizzax shahar “Buvijonlar maktabi” aʼzolari hamda OAV vakillari ishtirok etishdi.

Tadbirni partiyaning viloyat Kengashi rais oʻrinbosari Poʻlat Hamzayev ochib berar ekan, hozirgi kunda mamlakatimizda ayollarning qonuniy huquq va manfaatlarini himoya qilish, ularga barcha kerakli sharoitlarni yaratish borasida ulkan islohotlar amalga oshirilayotganini, nozik xilqat egalarining shaʼni, or-nomusi yuksak darajada qadrlanayotganini aytib oʻtdi. Lekin shunga qaramasdan, soʻngi paytlarda turli xil ijtimoiy tarmoqlarda ayollarga turli xil koʻrinishdagi tazyiqlarni oʻtkazish, xoʻrlash, kamsitish holatlari uchrab turganini, arzimas bahonalar bilan oilalar buzilib ketayotganini, kamsitilib, doʻpposlanayotgan ayollar ham bor ekanligini taʼkidladi.

Haqiqatdan ham, bunday qiyinchiliklar ichida yashayotgan, jabr koʻrayotgan ayollarga tegishli davlat tashkilotlari va ruhshunos yordami ham zarur. Shu bilan birgalikda bunday salbiy holatlarga tushgan ayollarning yana faol hayotga qaytishi, dunyoga chiroyli koʻzlar bilan boqishi uchun ham har birimizning tavsiyalarimiz, maslahatlarimiz, yordamimiz lozimdir.

Qolaversa, tadbirda soʻzga chiqqanlar tomonidan ayolni qadrlash, ardoqlash yuksak maʼnaviyatimiz belgisi ekanligi, oʻzlikdan, milliy qadriyatlarga hurmat bilan qarash lozimligi, naslimiz davomchilarini tahqirlash kelajakka zulm qilish ekanligi, ayolni xoʻrlash emas, unga ehtirom koʻrsatish oliy maqsadimiz boʻlishi kerakligi alohida eʼtirof etildi.

Tadbir qizgʻin savol-javoblar, fikr-mulohazalarga boy boʻldi.

“Adolat” SDP

Jizzax viloyat Kengashi Matbuot xizmati.