Xotira muqaddas — qadr aziz

Insonga har daqiqa, soniya tinchlik-osoyishtalik va xotirjamlik kerak. Tinchligini yoʻqotgan xonadon ham, mamlakat ham aslo xotirjam boʻla olmaydi. Tinchlik-xotirjamlik – taraqqiyotimiz garovidir. Biz azal-azaldan tinchliksevar millatmiz. Aynan shu gʻoya targʻibotiga bagʻishlangan buyuk milliy maʼnaviy merosimiz bor. Ularning barchasida tinchlikning qadriga yetish targʻib etiladi, urush esa batamom qoralanadi.

9-mayni Xotira va Qadrlash kuni tarzida umumxalq bayrami sifatida nishonlab kelayotganimiz zamirida ham aynan ana shu ezgu maqsad yotibdi. Hamon oramizda urush qatnashchilari, front ortida mehnat-mashaqqat chekkanlar bor. Oʻtganlarni xotirlash, safimizda yurganlarning esa qadriga yetish kerak. Mustaqil Oʻzbekiston xalqi va davlati avval-boshdan tinchlik-totuvlik tarafdori sifatida maydonga chiqdi. Ana shu asoslarga koʻra, mustaqillik yillarida ham bizda 9 may umumxalq bayrami sifatida, 1999 yildan boshlab esa Xotira va Qadrlash kuni sifatida nishonlaymiz. Darhaqiqat, Mustaqil davlatning bayramlari ham xalq tabiati va anʼanalariga mos boʻlishi kerak. Chunki har bir xalq qanday yashashi, nimani qadrlashi, qaysi sanalarni tantana qilishini oʻzi hal etadi. Bunda oʻz tarixidan kelib chiqadi, bugunini oʻylaydi va kelajagini koʻzda tutadi.

Joriy yilning 2-may kuni Prezidentning “Ikkinchi jahon urushi qatnashchilarini ragʻbatlantirish toʻgʻrisida” farmoni imzolandi. Hujjat Oʻzbekistonda 9 may – Xotira va qadrlash kuni umumxalq bayrami sifatida keng nishonlanishi, shuningdek, Ikkinchi jahon urushida halok boʻlgan ajdodlar xotirasini abadiylashtirish, bugun ham safimizda turib, Vatanning obroʻ-eʼtiborini yuksaltirishga, yoshlarni maʼnaviy-axloqiy jihatdan tarbiyalashga hissa qoʻshayotgan faxriylarni eʼzozlash hamda fashizm ustidan qozonilgan gʻalabaning 78 yilligi munosabati bilan urush qatnashchilari va nogironlarini moddiy ragʻbatlantirish maqsadida qabul qilindi.Unga koʻra, Ikkinchi jahon urushi qatnashchilari va nogironlarining har biriga 18 000 000 (oʻn sakkiz million) soʻm miqdorida bir martalik pul mukofoti belgilandi.

Oʻz mustaqilligiga erishgan davlatlar ichida Oʻzbekiston buning chinakam namunasini koʻrsatdi. Xotira va Qadrlash kuni  milliy – umumxalq bayramiga aylandi. Bu bayramning mazmun-mohiyati butkul oʻzgardi – u xalq xotirasi va insonni qadrlash kuniga aylandi.   Shu kuni Oʻzbekistonning barcha qabristonlaridan ziyoratchilar arimaydi.

Bu bayramda Ikkinchi jahon urushida halok boʻlganlar xotirlanadi, Afgʻoniston urushida halok boʻlganlar shoʻro siyosatining begunoh qurbonlari sifatida eslanadi, umuman, oʻtganlar ruhi yodga olinadi, mustaqillik yillarida xizmat burchini bajarish chogʻida halok boʻlgan harbiy xizmatchilar va huquqni muhofaza qilish organlari xodimlarining xotirasi oldida hurmat bajo keltiriladi.

Ikkinchi jahon urushida halok boʻlgan minglab yurtdoshlarimiz xotirasini yod etish, olovli janggohlardan omon qaytgan bobolarimizga, front ortida ogʻir kunlarni sabr-bardosh bilan yenggan, mashaqqatli sinovlarda oʻzligini yoʻqotmagan, imoni butun ajdodlarimizga mehr-oqibat koʻrsatish tom maʼnoda milliy anʼanaga aylandi. Ushbu beshafqat urushda qatnashgan 1,5 milliondan ortiq oʻzbekistonliklarning yarim milliondan ziyodi halok boʻlganini xalqimiz hech qachon yodidan chiqarmaydi. Front hududlaridan Oʻzbekistonga koʻchirilgan bir millionga yaqin oila va bolalarni qabul qilib, oxirgi bir burda nonini ular bilan baham koʻrgan xalqimiz oʻzining naqadar olijanobligini, mehr-muruvvatini, yuksak maʼnaviyatini yaqqol namoyon etdi.

Fashizm ustidan qozonilgan gʻalabada xalqimizning ham mardonavor va salmoqli hissasi unutilmas haqiqatdir. 9 may – Xotira va Qadrlash kuni Ikkinchi jahon urushining ayanchli oqibatlarini unutmaslikka, tinchlik va osuda hayotning qadriga yetishga, Vatanga sadoqat hissi bilan yashashga, shuningdek, doimo ogoh va hushyor boʻlishga, tarixiy xotiraga sadoqat ruhida tarbiyalashga xizmat qilib kelmoqda.

Ulug’bek Ashirov,

Qarshi Davlat universiteti tuzilmasidagi  

“Qatag’on qurbonlari xotirasi”

Muzeyi ilmiy xodimi, partiya faoli.