Yangi Oʻzbekiston bunyodkorlarimiz

Yangi Oʻzbekistonni barpo etish yoʻlida joriy yilning 11- sentyabr kuni Oʻzbekiston Respublikasi Prezidentining “Oʻzbekiston – 2030” strategiyasi toʻgʻrisida”gi Farmoni hamda “Oʻzbekiston – 2030” strategiyasini 2023-yilda oʻz vaqtida va sifatli amalga oshirish chora-tadbirlari toʻgʻrisida”gi qarori qabul qilinganligini barcha yurtdoshlarimiz mamnuniyat bilan qarshi oldi. Chunki bu harakatlar strategiyasi – vatan taqdiriga, xalqimizning ertangi kuniga befarq boʻlmagan yurtdoshlarimizning orzu istaklari va muhim takliflari bilan toʻldirilgan muhim hujjatdir.

Yurtdoshlarimiz Yangi Oʻzbekistonni barpo etish boʻyicha xohish-irodasini roʻyobga chiqarish, sogʻlom, bilimli va maʼnaviy barkamol avlodni tarbiyalash, kuchli iqtisodiyotni shakllantirish, adolat, qonun ustuvorligi, xavfsizlik va barqarorlikni kafolatli taʼminlashda muhim oʻrin tutadigan mazkur hujjatni toʻlaqonli amaliyotda tatbiq etilishiga katta umidvorligini bildirmoqda.

Yangi tahrirdagi konstitutsiyani qabul qilinishi orqali xalqimiz chuqur anglab yetdiki, mamlakatimiz taraqqiyotining asosiy yoʻnalishlarini takomillashtirish va ulkan islohotlarni yangi bosqichga olib chiqishda muhim ahamiyat kasb etadi. Mazkur muhim hujjatlar ham kelgusi 7 yil davomida xalqimiz farovonligi, yurt taraqqiyotiga xizmat qilishiga ishonamiz.

Prezident Farmoni bilan tasdiqlangan “Oʻzbekiston – 2030” strategiyasida beshta ustuvor yoʻnalish boʻyicha 100 ta muhim maqsadlar mujassamlashgan. Shukrki, yurtimiz tinch, mamlakatimizda olib borilayotgan iqtisodiy islohotlar natijasida Oʻzbekistonning nufuzi dunyo mamlakatlari orasida ortib bormoqda.

Kelgusi davrda barqaror iqtisodiy oʻsish orqali daromadi oʻrtachadan yuqori boʻlgan davlatlar qatoridan oʻrin olish, aholi talablariga va xalqaro standartlarga toʻliq javob beradigan taʼlim, tibbiyot va ijtimoiy himoya tizimini tashkil qilish, aholi uchun qulay ekologik sharoitlarni yaratish, xalq xizmatidagi adolatli va zamonaviy davlatni barpo etish, mamlakatning suvereniteti va xavfsizligini kafolatli taʼminlash strategiyaning asosiy gʻoyalari ekanligi xalqimizni birdek quvontirmoqda.  

Men “Adolat” SDP Fargʻona viloyat Kengashi raisi hamda tadbirkor sifatida shuni aytishim mumkinki, bugun biz tadbirkorlar uchun keng imkoniyatlar yaratilmoqda. Buning uchun yurtboshimizdan minnatdorman.

Harakatlar strategiyasida yalpi ichki mahsulot hajmini 2 barobar oshirish, kambagʻallikni ikki barobarga kamaytirish maqsadlari qoʻyilmoqda. Biz kabi tadbirkorlarga berilayotgan ishonch va yaratilayotgan imkoniyatlar bizni yanada shijoat bilan ishlashga, yangi ish oʻrinlarini yaratishga undaydi.

Yurtimiz ertangi kuni boʻlgan oʻgʻil- qizlarimizni maktabgacha taʼlim bilan qamrov darajasini 100 foizga yetkazish masalasiga alohida eʼtibor qaratilganligi har kuni xalq bilan yuzma –yuz muloqotlarda yurtdoshlarimizning eʼtirofini eshityapmiz. Ayniqsa, davlat maktabgacha taʼlim tashkilotlarini 100 foiz kompyuter sinfi bilan taʼminlash orqali tarbiyalanuvchilarda boshlangʻich kompyuter savodxonligi koʻnikmalarini shakllantirish, maktabgacha taʼlim tashkilotlarini toza ichimlik suvi va zamonaviy sanitariya- gigiyena infratuzilmasi bilan taʼminlash vazifalari katta ahamiyatga ega.  

Harakatlar strategiyasida umumiy oʻrta taʼlim tizimida “Taʼlim uchun qulay muhit” dasturini amalga oshirish 700 ga yaqin nomdagi yangi darsliklar, mashq daftarlari, pedagoglar uchun metodik qoʻllanmalar va mobil ilovalar yaratish, yangi avlod darsliklari asosida planshetlar uchun 1 000 ta multimedia dasturlarini yaratish vazifalari belgilangan. Yana eʼtiborli jihati, taʼlim tashkilotlariga har yili 500 nafar “til egalari” boʻlgan xorijiy mutaxassislarni jalb etish maqsad qilingan. Barcha umumiy oʻrta taʼlim muassasalarida kasb-hunarlarga oʻrgatish kurslarini joriy etish, Prezident maktablari va ixtisoslashtirilgan maktablarning taʼlim metodikasini barcha umumiy oʻrta taʼlim muassasalarining oʻquv jarayonlariga joriy qilish, olis va chekka hududlarda joylashgan 715 ta umumiy oʻrta taʼlim muassasalari oʻquvchilari uchun bepul avtobuslarni yoʻlga qoʻyilishining belgilanishi xalqimizni Yangi hayot uchun, Yangi Oʻzbekiston uchun yanada jipslashishga undaydi.

Bir soʻz bilan aytganda, beshta ustuvor yoʻnalish boʻyicha 100 ta muhim maqsadlarni oʻzida mujassam etgan “Oʻzbekiston – 2030” strategiyasining barcha yoʻnalishlarida koʻzda tutilgan maqsad-vazifalar kelgusidagi taraqqiyotimizga, mamlakatimiz rivoji va xalq farovonligiga xizmat qiladi.

Shahnoza Gʻaniyeva,

"Adolat" SDP Fargʻona viloyat Kengashi raisi.