Yangi Oʻzbekistonni birgalikda bunyod etamiz

Mamlakatimizda amalga oshirilayotgan ulkan islohotlar Oʻzbekistonning jahonda hech kimdan kam boʻlmaydigan taraqqiyoti yoʻlidagi ulugʻvor maqsadlarga qaratilgan. Bugungi kelajak avlod qanchalik bilimli, tarbiyali, dunyoqarashi keng, faol fuqarolik pozitsiyasiga ega vatanparvar boʻlib kamolga yetsa, yangi Oʻzbekistonni qurishga shu qadar kamarbasta boʻladi.

Darhaqiqat, yangi Oʻzbekistonni xalqimiz bilan birgalikda barpo etamiz, degan ulugʻvor maqsadlar zamirida ertangi kelajagimiz, yurtimiz taraqqiyoti masalasi turibdi.

Bugungi “Adolat” SDP Gʻuzor tumani Kengashi tomonidan “Yangi Oʻzbekistonni birgalikda bunyod etamiz” mavzusida davra suhbati tashkil etildi. Tuman madaniyat uyi tadbirgohida uyushtirilgan tadbirda partiya faollari, oʻqituvchilar, yoshlar vakillari qatnashdi. Unda tuman Kengashi deputati Shuxratjon Usmonov kun tartibidagi masala yuzasidan maʼruza qildi.

-Bugungi kunda butun jamiyatimiz aʼzolarining bilimi, dunyoqarashi, saviyasini oshirish uchun avvalo ilm-maʼrifat, yuksak maʼnaviyat kerak, — dedi Shuxratjon Usmonov.- Ilm yoʻq joyda qoloqlik, jaholat va albatta toʻgʻri yoʻldan adashish boʻladi. Sharq donishmandlari aytganidek, “Eng katta boylik, bu aql zakovat va ilm, eng katta meros- bu yaxshi tarbiya, eng katta qashshoqlik – bu bilimsizlikdir!” shu sababli hammamiz uchun zamonaviy bilimlarni oʻzlashtirish, chinakam maʼrifat va yuksak madaniyat egasi boʻlish uzluksiz hayotiy ehtiyojga aylanishi kerak.

Shuni unutmaslik kerakki, ertangi farovon hayotimiz bugun oʻsib-ulgʻayayotgan yoshlarning har tomonlama ilm-maʼrifatli, zamonaviy bilimlarni chuqur egallaganliklariga koʻp jihatdan bogʻliq. Shu tufayli ham prezidentimiz najot taʼlimda, tarbiyada, bilimda ekanligini taʼkidlab, “Taʼlim – tarbiya bu bizning kelajagimiz, hayot, mamot masalasi”, deya koʻp bora taʼkidlayaptilar.

Shundan soʻng tadbirga soʻzga chiqqan xalq deputatlari viloyat Kengashi deputati Qoʻyli Narzullayev, pedagog Feruza Roʻziyeva va boshqalar yurtimizda “Yangi Oʻzbekiston maktab ostonasidan boshlanadi”, degan ezgu daʼvat ostida yosh avlod kamoli yoʻlidagi izchil islohotlar koʻlami kun sayin ortayotgani haqida toʻlqinlanib gapirdilar. Taʼlimdagi oʻzgarishlar birgina viloyatimiz xalq taʼlimi tizimi hayotida ham yaqqol namoyon boʻlayotir.

Shuningdek, tadbirda Yangi Oʻzbekistonni birgalikda bunyod etishi uchun yangiliklarga, tashabbuslarga intilib faoliyat yuritish ham muhim ahamiyatga ega ekanligi qayd etildi.

Tadbirda taʼlim sifati va samaradorligini oshirish yuzasidan kelgusidagi vazifalar belgilab olindi.

Endi oldimizda davlatimiz rahbarining murojaatnomasida belgilangan va Yangi Oʻzbekistonni bunyod etishdek ulugʻvor vazifalar turibdi. Xalqimiz bilan jipslashib yagona kuch boʻlib, bu vazifalarni ham uddalashimizga ishonamiz.

Bahrom Mustafayev,

“Adolat” SDP G‘uzor tuman Kengashi raisi.