Yashashning yuqori darajasi ta’minlanadi

Oliy Majlis Qonunchilik palatasi deputati Abdug‘ani Umirovning Nishon tumanidagi Ibn Sino mahallasi  fuqarolari bilan uchrashuvida yurtdoshlarimiz uchun farovon hayotni,  yashashning yuqori darajasini ta’minlashga qaratilgan takliflar ilgari surildi.

Uchrashuvda mahalla faoli Ravshan Xudoyqulov davlat bog‘chasi qurishga yordam berish haqida deputatga murojaat qilgan bo‘lsa, MFY raisi va bir guruh a’zolari ayrim xonadon egalari tomonidan yerlar noqonuniy egallab olingani hamda buning evaziga mahalla ko‘chalarini asfalt qilish, obodonlashtirish qiyin kechayotganligini ma’lum qilishdi.

Deputat Abdug‘ani Umirov va xalq deputatlari tuman Kengashi kotibiyati mudiri Ubaydulla Usmonov tomonidan  murojaat o‘rganilib, aholining davlat bog‘chasiga bo‘lgan ehtiyojini qanoatlantirish masalasi tuman Kengashining navbatdagi sessiyasi kun tartibiga muhokamaga qo‘yiladigan bo‘ldi. Shuningdek, odamlarni qiynab kelayotgan boshqa muammolarni o‘rganib, bartaraf etish yuzasidan deputat tomonidan tuman kadastr agentligiga ko‘rsatmalar berildi.

Abdug‘ani Umirov aholining farovon turmushini ta’minlashga qaratilgan nishonlik saylovchilar bilan uchrashuvlari ana shu tarzda qizg‘in davom etmoqda.

            “Adolat” SDP Qashqadaryo viloyat Kengashi Matbuot xizmati.