Yer hisobi va kadastr xizmatlarini yaxshilash borasida muhim topshiriqlar berildi

Yer — jamiyat boyligining asosi hamda boshlangʻich manbai, xalq xoʻjaligining barcha tarmoqlarini rivojlantirishning asosiy poydevori va qishloq xoʻjaligining asosiy ishlab chiqarish vositasidir. Shu bilan birgalikda, xalqimizning hayoti, faoliyati va farovonligining asosi, eng muhim tabiiy resursi hisoblanadi.

Uning hisobini aniq yuritish va samarali foydalanish qishloq xoʻjaligi, ishlab chiqarish, tadbirkorlik subyektlari kabi juda koʻplab sohalar uchun oʻta muhimdir. Shu sababli, yerlardan oqilona, samarali va belgilangan maqsadda foydalanishni taʼminlash, u erlarni muhofaza qilish davlatning eng muhim vazifalaridandir.

Kuni kecha Oʻzbekiston Respublikasi Prezidenti Shavkat Mirziyoyev boshchiligida boʻlib oʻtgan yigʻilishda ham yer munosabatlarini takomillashtirish masalalari koʻrib chiqildi.

Yigʻilishda yoʻl va suv fondi yerlari kadastrini yakunlab, ulardan foydalanishga sharoit yaratish boʻyicha koʻrsatma berildi. Bu orqali 1 million aholi bandligini taʼminlash mumkinligi taʼkidlandi.

Shu bilan birgalikda, respublikada 2,4 millionta xonadonning egalik hujjati yoʻqligi. Ularning kadastr hujjati qilinsa, odamlarga huquqiy, iqtisodiy zamin boʻlishi eʼtirof etildi. Shu bois mutasaddilarga hujjatsiz uy-joylarga egalik huquqini berish boʻyicha qonun loyihasini yakuniga yetkazish vazifasi qoʻyildi.

Shuningdek, aholi uzoq yillardan buyon uy-joy sifatida foydalanib kelayotgan, lekin hujjatda qishloq xoʻjaligi yerlari boʻlib qolayotgan 817 ming gektar yerni xatlovdan oʻtkazib, yer toifasini oʻzgartirish taklifi bildirildi.

2024-uil 1-iuuldan respublikaning barcha hududlarida xususiy kadastr muhandislari faoliyati yoʻlga qoʻrilishi belgilandi.

Yigʻilish soʻngida davlatimiz rahbari kadastr xizmatlari qamrovi va sifatini oshirish, buning uchun malakali kadrlar tayyorlash, sohani ilm-fan bilan uygʻunlashtirish va raqamlashtirishga alohida eʼtibor qaratish zarurligini alohida qayd etdi.

Xulosa oʻrnida aytish mumkinki, yerning har qarichi oltinga teng. Demak, inson yashashi, rizq topishi, turmushini farovon qilish uchun undan unumli foydalanmogʻi lozim.

Uktam Qurbonov,

“Adolat” SDP Jizzax viloyat kengashi mutaxassisi.