Yosh kadrlar — eʼtiborda

Abbosbek Usmonxoʻjayevni taniganimga uncha koʻp vaqt boʻlgani yoʻq. Partiyamizga aʼzo boʻlganiga endi ikki yildan oʻtdi. Lekin qisqa davr ichidayoq u oʻzining faolligi, tadbir va yigʻilishlarda bildirgan mulohazalarning teranligi bilan koʻpchilikning yodida qoldi.

- Muhammadsharif Sufizoda nomli viloyat bolalar axborot-kutubxona markaziga tadbir oʻtkazish uchun borgandiye-deb eslaydi. “Adolat” SDP Namangan shahar kengashi raisi Mirzarahmat Olimov. — Mavzu boʻyicha maʼruza qildim, keyin ishtirokchilardan munosabat soʻradim. Shunda-birinchi boʻlib yoshgina yigit soʻzga chiqdi. Ammo fikrlari joʻyali va mantiqli mulohazalari tiniq edi. Shu-shu uni tadbirlarga taklif eta boshladim.

Abbosbek sekin-asta partiyaning yosh faollaridan biriga aylandi. “Adolat” SDP safiga kirdi. Ayni paytda shahar kengashida “Yosh adolatchilar” qanoti rahbari. Abbosbek hozir yigirma bir yoshda. Yuqorida tilga olingan kutubxonada uslubchi boʻlib ishlaydi. Hamkasblari bilan birgalikda kitobxonlar uchun turli tadbirlar oʻtkazishdan charchamaydi. Shu jarayonda oʻzi ham koʻp oʻqiydi, bilimini muntazam oshirib boradi. Bu Namangan davlat universiteti tarix fakultetida sirtdan oʻqishida ham yordam bermoqda.

Abbosbek Namangan shahrining qoq markazidagi Sardoba dahasida tugʻilib oʻsgan. Shu yerdagi 5-umumtaʼlim maktabida oʻqigan. Oʻshandayoq adabiyot tarix, geografiya kabi fanlarga alohida mehr qoʻygan.

- Maktabimiz shahardagi toʻngʻich maʼrifat maskanlaridan biri, — deydi Abbosbek. — Bu yerda akademik Yolqin Toʻraqulov, xalq artisti Yoqub Ahmedov, xalq shoiri Habib Saʼdulla kabi allomalar tahsil olishgan. Men ham ular kabi taniqli inson boʻlib yetishishni orzu qilaman. Siyosiy faoliyatga qiziqaman, “Adolat” partiyasi aʼzosi sifatida jamiyat taraqqiyotiga munosib hissa qoʻshmoqchiman. Darvoqe, yaqinda Abbosbek oʻzining ana shu maqsadlari yoʻlida dastlabki qadamni qoʻydi. Uning nomzodi safdoshlarimiz tomonidan “Yoshlar parlamenti” aʼzoligiga koʻrsatildi. Barcha saralash bosqichlaridan muvaffaqiyatli oʻtdi va “Adolat” SDP Siyosiy Kengashi navqiron partiyadoshimiz nomzodini Oliy Majlis Qonunchilik palatasiga taqdim etdi.

“Yosh adolatchilar” qanoti aʼzolari uni bu yutuq bilan qizgʻin tabrikladilar.

Nurbek Abdullaev,

“Adolat” SDP Namangan viloyat 

Kengashi matbuot kotibi.